Kathy Ruiz-Paskel, directora di DIMAS:
ORANJESTAD (AAN) Directora di DIMAS, señora Kathy Ruiz-Paskel, a sigui relata den entrevista cu Matutino DIARIO, tocante e proceso cu ta tumando lugar, encuanto otorgamento di permiso di trabao pa personanan imigrante, y di e peticionnan cu ta drenta DIMAS.
“Mi ta kere cu importante ta cu tin un record aworaki, den e trayecto 4, cu ta dura te cu fin di December proximo pa hendenan registra, y nan ta haciendo bon uso di esaki. Nan ta haci nan cita y si nan mes no por, nos tin un partner cu hunto cu e consul di Colombia a pone fondonan na VeneAruba, Y tin hendenan pa yuda traha nan cita, pone nan documentonan na ordo, y traha nan CV, pasobra nos ta registrando e talento di tur e hendenan cu ta bisa cu nan ta na Aruba, pero no a logra haya e dunador di trabao, anto hunto nos ta guiando e proceso pa e hendenan por bin na un permiso.”
“Nos ta yame un ‘brugjaar’, anto den e brugjaar ey nos lo mester busca wak con nos por asisti pa nan por haya un dunador di trabao cu por ta, por tuma nan den servicio y e ora ey pidi sigui bay dilanti, pasobra e permiso di un aña ey, no ta prolonga”, director di DIMAS, señora Ruiz-Paskel a bisa.
