ORANJESTAD (AAN): Seccion di Malesanan Infeccioso di Departamento di Salud Publico a lansa su campaña annual di vacunacion contra Influenza cu e slogan:
“Influenza no ta djis un simple griep” recordando tur persona cu Influenza no ta un griep ordinario pero cu e por conduci na hospitalisacion debi na complicacionnan grave y asta morto especialmente bou e grupo vulnerable.
Pakico esaki ta importante: Tur aña influenza ta causa miles di complicacion y morto cu ta prevenibel cu un vacuna. Hopi hende no ta conciente of ta ‘underestimate’ e gravedad pensando cu Influenza ta produci sintoma di griep manera otro virus.
Esaki no ta e caso pa tur hende, un Infeccion cu Influenza cerca un persona den e grupo di risico por ta hopi mas grave cu cerca un persona cu no den e grupo di risico. Esaki ta e motibo pakico e campana aki ta focus riba e importancia di vacuna na tempo pa proteha bo mes si bo ta cay bou di e grupo di risico.
Kende mester worde vacuna: E vacuna di Influenza ta recomenda pa tur persona cuminsando for di 6 luna di edad. Especialmente importante pa e siguiente grupo di persona: (*) Adulto mayor di (60+). (*) Persona cu malesa cronico of condicion di salud manera (asma, diabetes, problema di curason, presion halto, sistema inmunologico debil, etc). (*) Dunadornan di cuido y trahadornan di prome linea. (*) Muchanan bou 5 aña.
E vacuna ta disponibel na seccion di Malesanan Infeccioso di dialuna pa diabierna for di 1:30 pm pa 4:00 pm pa medio di sistema di ‘WALK IN’ y tambe den diferencia bario entre otro: (*) Diahuebs 13 november, 8-11 am, na Stadion Frans Figaroa. (*) Diabierna 21 november, 8-11 am, na Centro Playa Pabou. (*) Diahuebs 27 november, 8-11 am, na Sporthall Santa Cruz.
Pa ricibi e vacuna ciudadanonan di 60+ mester presenta unicamente cu nan AZV, ciudadanonan cu no tin 60 aña ainda pero ta sufri di un malesa cronico of ta cay bou di e grupo di risico mester trece un recept di dokter y nan AZV.
Personanan cu no ta den e grupo di risico pero ta desea pa haya e vacuna, por cumpra esaki na un balor di 20 Florin. Por pasa na oficina di seccion Malesanan Infeccioso na Avicena straat#1 entre 1:30 pm pa 3.30 pm entrante dia 24 november 2025. Pa cumpra vacuna por unicamente paga via swipe of transfer, no por paga cash.
Dunadornan di cuido y trahadornan di prome linea tambe por busca nan vacuna na nos seccion entrante di 24 november for di 1.30 pa 4.00 pm cu nan AZV.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na This email address is being protected from spambots. You need JavaScript enabled to view it.
