Judelca Briceño di DVG
*Rond di 35 persona ta wordo diagnostica anualmente cu cancer di tripa
ORANJESTAD (AAN): Manera a keda anuncia caba diaranson, Fundacion ABO y Departamento di Salud di Aruba (DVG) ta trahando hunto den loke ta cuido preventivo. Awor ta bira posibel pa no solamente haci screening di cancer di pecho, pero tambe di boca di matriz y tripa grandi.
Relaciona cu e colaboracion aki, Judelca Briceño, miembro di e management team di Departamento di Salud a duna di conoce cu for di aña 2023, DVG a haci un encuesta y e resultado di 'STEPS Survey' aki a demostra cu un total di 79% di e poblacion ta sufri di sobrepeso di cual 46% ta padece di e malesa obesidad.
Briceño a agrega cu tambe a keda conclui cu un total di 95% di e poblacion ta na riesgo pa desaroya enfermedad cronico di cual 38% tin un riesgo halto. E riesgo aki ta bin door di diferente factor: comemento no saludabel, tiki movecion fisico, humamento y consumo halto di alcohol.
E datonan aki ta indica Aruba mescos cu mundialmente tambe ta core un risico grandi pa hende fayece a causa di e malesa di cancer, el a agrega.
Segun cifranan mundial, cancer ta e di tres causa mas grandi pa cu mortalidad. Na Aruba esaki no ta e excepcion. Na Aruba, cancer di matriz ta un cancer comun manera tambe cancer di tripa. Pues, si ta compara e datonan di Aruba cu Hulanda, un promedio di 25% ta muri como consecuencia di cancer di tripa aki na Aruba. Pa consecuencianan di cancer di matriz, aki na Aruba tin un mortalidad di 33% mas, e representante di DVG a remarca.
E cifranan aki conhuntamente cu e resultado di STEPS 2023 ta urgi pa DVG y pais Aruba tuma e pasonan preventivo pa combati e malesa aki na Aruba.
CANCER DI MATRIZ
El a sigui bisa cu pa loke ta prevalencia di cancer di matriz, tin un promedio di mas o menos 10 diagnostico di cancer di matriz pa aña. Tres di e dies hende muhenan cu ta sufri di e tipo di cancer aki ta muro di dje. Cincuenta porciento di hende muhe cu ta diagnostica ta entre 30 cu 35 aña y 50% di hende muhe cu ta diagnostica pa cancer di matriz cu ta fayece ta entre 45 cu 70 aña.
CANCER DI TRIPA
Pa loke ta cancer di tripa, el a bisa cu tin un promedio di 35 persona (hende homber y hende muhe) cu ta wordo diagnostica anualmente cu cancer di tripa. El a sigui bisa cu 16 di e personanan aki ta muri anualmente di e tipo di cancer aki. Cincuenta porciento di e personanan cu a wordo diagnostica ta entre 60 y 76 aña. Cancer di tripa ta mas comun entre personanan mayor di 55 aña.
Pakico ta boga pa bin cu un colaboracion cu Fundacion ABO pa screening di cancer? Considerando e resultadonan di STEPS, DVG ta sinti su mes responsabel cu su tarea di preveni malesanan bao di e poblacion, pa actua y bin cu programanan pa mitiga e tipo di malesanan aki, Judelca Briceño a indica.
