Tin un proceso pa instala billboard den tereno publico of den un parcela

Audrey Croes, PR NV Elmar ta splica

ORANJESTAD (AAN) E Relacionista Publico di NV Elmar, Audrey Croes, a comenta den entrevista cu Matutino DIARIO, cu e tema di seguridad ta hopi importante pa nos tur en general, y sigur pa loke ta coriente cu, aunke no ta visible, tin su peliger cu mester tene cuenta cu ne.

   El a splica cu pa loke ta instalacion di billboard tin dos situacion cu por presenta: ora cu un cliente of un compania kier instala un billboard riba tereno publico, of dentro di su parcela.

“Den caso cu ta den tereno publico, e peticion ta bay cerca DOW, y na su turno DOW ta tuma contacto cu Elmar, check si tin bezwaar riba esaki.

Cu bezwaar e ta relata si den e areanan cu tin cablenan bao tera, of si den e area tin linea di coriente. Asina e proceso ta cana ora cu e ta pasa riba tereno publico. Numa, ora cu ta pasa dentro di tereno di un cliente e situacion ta diferente. Tin dos situacion cu por presenta: of e cliente ta haci peticion pa un meter acerca, door cu e no ta desea cu e facturacion pasa via su meter principal, e kier un facturacion separa, na e momento ey Elmar ta tuma contacto cu e cliente aki cu a instala un billboard den su parcela”, Croes a señala.

Audrey Croes a agrega cu na mesun momento tambe, potencialmente e parti di seguridad ta wordo atendi cu ne.

Den caso cu e cliente no a haci peticion pa un meter acerca, no tin manera pa Elmar por ta na haltura di esaki, den e caso aki sea DTI ta nota esaki, of Elmar ta nota esaki y notifica DTI. “Pues DTI tin e encargo di e seguridad tecnico dentro di un parcela. Y na su turno e por haci peticion na Elmar pa desconecta e suministro di coriente den e parcela. Pues, tin diferente situacion cu por presenta pa locual ta instalacion di Billboard, pero cualkier situacion en general, vooral si nan ta bay halto, y e yamada di Elmar ta pa considera e parti di seguridad; coriente nos no ta mir’e pero tin su peligernan y esaki semper nos tin cu tin’e na cuenta”, Audrey Croes, Relacionista Publico di NV Elmar, a relata.