Perdedida di otro grupo di piscador tin atencion serio di comunidad
- Aplica multa halto pa tur traspaso di seguridad den nabegacion
- Accion pa temporada di horcan y mas turista cu no ta keda na hotel
ORANJESTAD (AAN) “Beach y laman no solamente ta importante pa turismo. Nan ta parti importante di e comunidad Arubano, manera ta keda demostra durante Semana Santa y sigur durante vacacion.”
Informantenan ta indica cu e ultimo caso di piscadornan perdi mester haya tur atencion y mester conduci na medidanan mas severo despues cu ya na otro ocasionnan pa medio di DIARIO nan a adverti pa peligernan hasta pa e cantidad creciente di turistanan, cu no ta registra na un hotel loke ta haci cu nan ta forma parti mas bien di e grupo local cu ta bishita beachnan.
Den e ultimo caso a bini dilanti segun informacionnan registra, cu e boto ariba cual e personanan perdi a bandona Aruba, hamas mester a subi laman ya cu e tabata tin un defecto peligroso pa bida di hende.
Cu mas insistencia ta wordo mustra cu den e temporada di vacacion 2025 na Aruba, ora ya e cantidad di usuarionan local di beach y deporte acuatico ta aumenta, segun cifranan turistico oficial e cantidad di turistanan cu ta bishita Aruba pero no ta keda den hotel tambe ta subi.
“Ora papia di turistanan cu no ta keda na un hotel cu ta ofrece e turistanan servicionan cu ta wordo bon controla como parti total nan estadia na hotel, mester conclui cu e mayoria di personanan aki lo bay beachnan publico y lo uni cu personanan cu no ta oficialmente activo den ramo di turismo pa goza di loke e beachnan di Aruba tin pa ofrece,”a bini dilanti.
Pa Aruba ya e hecho cu na varios ocasion ultimo tempo hende a perde nan bida ariba laman, ta un asunto cu ta exigi accion di control, den cual mester cuminsa aplica multa pa evita cu mas bida ta bay perdi.
E hecho cu un boto cu piscadornan ta subi laman y posiblemente a haci uzo di un boto cu no tabata den condicion pa enfrenta e olanan di laman, ta presenta un asunto serio pasobra ta trata di bida di ser humano na prome lugar.
Informantenan ta insisti, pa control severo tuma lugar na beachnan di Aruba pasobra tanto pa bida di e Arubiano como pa e imagen di Aruba den exterior, e ta sumamente malo.
Atrobe ta mustra cu hotelnan cu ta ofrece servicionan di laman of piscina, tin personal cu por atende cu turista cu den hopi caso ta bishita Aruba pa goza di e experencia di laman cu nan no conoce na nan pais.
Informacionnan negativo di incidentenan riba laman, ta mishi cu e sentido di seguridad cu turismo ta exigi pa beachnan na un pais turistico.
Pa e Arubiano tambe tin e aspecto di gravedad pasobra un persona por wordo invita pa ta parti di un grupo cu ta subi laman den loke e ta kere ta un boto sin problema, pero despues por ocasiona su morto.
Informantenan ta serio den nan exigencia pa mas control ariba embarcacionnan cu ta subi laman sigur den e temporada di horcan, den cual mester ricibi informacion di tur condicion di tempo y laman prome cu subi boto.
Mester tene consideracion tambe cu otro personanan cu mester subi laman pa trata di localiza esnan perdi y e riesgo cu nan tambe mester tuma.
Pa bolbe na e realidad turistico di Aruba, cu ta e sosten principal di economia di e pais, mester tene cuenta cu uzo di beachnan dor di turistanan cu no ta usuario di laman na Aruba na mes forma cu e turistanan cu por haci uzo di facilidadnan di hotel y nan sistemanan di control.
Un advertencia serio a bini pa e realidad cu e temporada di horcan cu a cuminsa na 2025 y ta drenta awor su luna di mayor actividad, ta conta cu un advertencia special den cuadro di e cambio di clima, cu ta acelera e velocidad cu cual e sistemanan ta desaroya y haya mas forsa.
Esaki ta nifica cu e tempo cu tin pa rescate di un embarcacion den problema, ta bira mas cortico.
Manera informantenan a indica, aplicacion di ley ta sumamente importante y mester tin control rigido ariba uzo di laman pa pesca y pa personanan cu ta disfruta di e deporte, cu mescos cu tur deporte ta exigi conocemento di e practicante y mester ta mara na regla rigido y control.
