Tin un canasta ‘high-tech’ di Lionfish cu a perde den lama

Santa Rosa involucra y ta pidi ayudo di comunidad

ORANJESTAD (AAN): Desde aña 2009 cu e prome Lionfish invasivo a keda registra den awanan rond di Aruba, Departamento di Agricultura, Cria y Pesca, conoci como Santa Rosa, a keda vigila e potencial peliger invasivo aki y investiga si por converti esaki den un pesca sostenibel cu por aporta na nos economia y seguridad di provee alimento propio fresco y saludabel.  Un pisca invasivo cu no tin ningun enemigo natural den lama.  Pues e ta yega pa destrui tur cos.  E ora a bin cu e idea pa e humanonan bay jaag riba nan, pa trata di reduci nan presencia.

   Asina por menciona cu a tuma lugar varios torneo di Lionfish, actividad culinario, investigacion cientifico y mucho mas pa tanto lanta e conocemento den comunidad como tambe colecta informacion practico cu por ser aplica na Aruba.

   Lionfish traps of canasta: ​Recientemente Santa Rosa a keda acerca pa sr. Patrick van Brakel, conoci pa su tantisimo videonan educativo di Lionfishhunter Aruba, como e Lionfish Snack Aruba, pa por duna un asistencia na su persona y un estudio cu el a inicia riba propio iniciativa y forsa.

   A resulta cu Sr. van Brakel a bin ta experimenta cu varios "Lionfish traps", conoci na Papiamento como “Canasta pa Lionfish”.  Su ultimo intento a ser poni algun siman atras, pa mala suerte prome cu pasada di e tormenta Beryl y awor e Canasta High-Tech aki, cu ta contene un luz y un camera, ta perdi.

   Despues di varios intento envano di buskeda y posibel recuperacion di e Canasta perdi aki, awor ta haci un yamada mas amplio pa ayudo.

   ​Santa Rosa mesora a compromete pa yuda sr. van Brakel pa recupera e artefactonan y tambe sigui yuda cu e investigacion riba Lionfish. E canasta ta un diseño cu a bin ta desaroya conhuntamente cu investigadornan na Bermuda y ta basa riba e diseño di Canasta di Kreeft di e area ey. E canasta ta un bari adapta pa laga Lionfish drenta pero dificil pa nan sali. E tin of tabata tin un boei y un anker na dje pa e keda sin por move. Manera menciona caba, e tabata tin tambe un luz y un camera instala.

   Ban yuda busca e Canasta: Awor ta pidi cooperacion di tur piscado, buceado y esnan cu ta bay lama regularmente, particularmente den area di Palm Beach, pa si por a nota esaki of cualkier cos, pa por fabor comunica cu sr. van Brakel of na seccion di pesca di Santa Rosa of na Centro di Pesca Hadicurari. Lo ta altamente aprecia tur informacion cu por yuda na recupera e artefactonan menciona.

   Si acaso abo a mira un hende a sali for di lama cu e Canasta aki, of tin’e na su cas warda, por fabor notifica esaki tambe.

   Investigacion valioso: ​Santa Rosa lo sigui conhuntamente cu demas instancia y organizacionnan relevante y interesa pa colecta y distribui informacion. Te ainda e manera mas eficaz pa controla Lionfish invasivo ta pa tira esaki cu un tipo di harpun. Hopi biaha ta usa e slingshot of polespear pa e tarea aki. E limitacion pa e metodo di sambuya y tira Lionfish ta cu ta unicamente unda hende por yega y sambuya, lo por controla Lionfish invasivo.

   E idea pa considera Canasta pa Lionfish ta cu usando e trampanan aki, posiblemente por yega na lama mas hundo cu hende por duik y posiblemente ta un metodo di pesca economicamente viable. Rond mundo ta unicamente algun lugar ta purbando cu e metodo aki y pa cual motibo lo ta sumamente balioso e resultadonan di e investigacion aki.