Minister Ursell Arends a confirma
*E tradicion di antes di traspaso di permiso lo no socede mas
ORANJESTAD (AAN): Cada ciudadano mester tin e oportunidad igual pa yega na remarke pa haci uzo di un permiso di transporte publico. E realidad ta diferente.
Tin cantidadnan maximo pa cada tipo di permiso di transporte publico (autobus, taxi, tour, ongeregeld, verhuur). Si tuma e sector di taxi como ehempel, actualmente tin un maximo di 465 permiso pa otorga. Practicamente tur ta otorga, algun pendiente nan prolongacion. Mientrastanto, hopi taxista, ora nan no kier of por core taxi mas, ta pidi pa traspasa e permiso cu nan ta haci uzo di dje pa un persona di nan escogencia.
Segun ley, Minister di Transporte por aproba un traspaso na un “lid van het gezin” di e taxista. Den pasado traspasonan a tuma luga na personanan cu no ta un “lid van het gezin” di e taxista. E posibilidad di traspaso tambe a wordo maluza pa bende permiso, cual no ta permiti. Pero den pasado Ministronan tabata mira esey cu e Taxista ta bende su permiso y ta haya un “bonus” pa bay goza di su pensioen. Cu e pensamento ey antes e tabata wordo permiti, y den pasado DIARIO a publica opinion di varios ex-Ministro riba e asunto ey.
Pero awor na 2024, e pensamento di Gobierno aparentemente a cambia. E posibilidad di traspaso a crea e situacion cu hopi di e permisonan cu ya ta limita, no ta yega bek cerca Gobierno pa otorga na otro ciudadano cu a haci peticion pa un permiso. Asina de facto a crea un ‘closed system’ caminda permisonan, cu ta patrimonio di pueblo, ta keda den famianan of ta bay na un persona di escogencia di un taxista, y den cierto caso ta wordo bendi ilegalmente.
Na september 2022 Minister Arends a revoca e maneho di ex-Minister Romero, y a introduci un maneho mas stricto. Awo a yega na e siguiente paso, cual ta pa para cu traspaso di permiso, promoviendo oportunidad igual pa ciudadanonan cu kier yega na remarke pa haci uzo di un permiso.
E maneho nobo, cu a wordo publica riba www.Publico.aw, ta encera cu desde 1 di september 2024 no lo aproba peticion di traspaso di permiso di transporte publico.
Peticionnan haci prome cu 1 di September 2024 lo wordo trata conforme e maneho vigente di 26 di september 2022, tambe obtenibel riba e website di ww.Publico.aw. Desde 1 di september 2024, e maneho di 26 di september 2022 ta keda revoca y no lo tin mas traspaso di permiso.
