Tin sugerencianan den rapport tocante Landspakket y cambio laboral/social cu ta inaceptabel

Sindicatonan ta reacciona:

ORANJESTAD (AAN): E sindicatonan di Aruba; FTA, SEPPA, SIMAR, SPA, TOPA, STT, ABV, STA, SIWA, IOWUA, SADA y e organisacion OPPA, kier a duna un aclaracion riba e encuentro cu tabatin recientemente entre e gremionan sindical, comercial y gobierno tocante algun rapport cual a wordo traha a base di e sugerencianan di e asina yama “Landspakket” y cu ta trata cambio y of e ahustenan riba nivel laboral y social.

            Na prome lugar nan kier a aclarea cu apesar cu e encuentro aki a wordo yama Congreso Nacional Social Laboral (DTSL), e procedura y contenido di esaki no tabata di un congreso pero di un encuentro informativo.

            E sindicatonan conhuntamente a indica esaki den un carta cu a wordo entrega riba dia di e evento y di cual copia a wordo manda tambe pa Hulanda como esun cu ta sugeri reforma den e asina yama “Landspakket”.

            Pa locual ta trata e contenido di e informacion cu a wordo duna, mester remarca cu apesar cu algun di e sugerencianan tin algun aspecto beneficioso pa e trahado, tin algun sugerencia tambe cu pa nan como sindicato ta absolutamente inaceptabel.

            Entre otro por menciona e sugerencia pa elimina restriccion riba contracto di corto duracion, cual lo resulta den un retroceso enorme den e derechonan di e clase trahado y cu efecto desastroso pa e trahado y su futuro.

            E sindicatonan ta lamenta y preocupa cu dilanti un aña nobo parlamentario, unda mas bien tabata di spera cu tin miho perspectiva nos dilanti pa e trahado tin su dilanti cambionan grandi. Seguridad Laboral y Social ta importante pa e hende, esaki sigur lo duna un direccion na unda nos kier bay como pais cu nos ciudadanonan.

            E sindicatonan conhuntamente ta evaluando tur e sugerencianan cu a wordo presenta den e raportnan y lo trece un punto di salida conhunto una bez e evaluacion di e diferente documentonan ta cla.