Gobierno ta confirma:
*Un aumento responsabel di 20 miyon florin compara cu argumento sin logica di Mike Eman
ORANJESTAD (AAN): Durante un presentacion diaranson mainta, señor Jonathan Upegui di Directie Economische Zaken, Handel en Industrie (DEZHI) a brinda informacionnan y bon noticianan di e crecemento economico positivo pa nos pais pa 2025.
Prome Minister Evelyn Wever-Croes a remarca cu e bon noticianan aki por trece trankilidad tambe pa esnan cu ta preocupa ainda cu si tin placa pa entre otro e rebaho di tarifanan di inkomstenbelasting y loonbelasting cu Gobierno a implementa e luna aki. “Cu e bon noticia aki, nos ta confirma cu tin suficiente espacio financiero pa esakinan”, Prome Minister a enfatisa.
Refiriendo na e cifranan di surplus, Prome Minister a indica cu Aruba tawata tin un surplus di 1.8% pa e aña aki. E norma tawata 1% y esaki a crea suficiente espacio pa baha tarifanan di inkomstenbelasting y loonbelasting. Cu e rebahonan aki, surplus awo ta na 1.5%, ainda e ta 0.5 % mas halto di loke ley ta prescribi.
Prome Minister:
“P’esey mi ta lamenta comentarionan di lider di oposicion, señor Mike Eman, cu a bisa cu e rebaho di e impuestonan aki no ta bon y a expresa cu e lo elimina e rebahonan aki nificando cu e lo pone tur hende paga mas impuesto pasobra esakinan lo ta kita di e placa cu e tawata tin mester pa hisa pensioen cu awg.700, pa luna pa nos pensionadonan despues di 100 dia cu e drenta gobierno”.
Argumento sin logica di Mike Eman
Esaki, Prome Minister a enfatisa, sigur no ta na su luga, pasobra e rebaho di impuesto aki a costa rond di 20 miyon florin, cu a causa cu e surplus a baha tambe di 1.8% pa 1.5% kedando ainda cu 0.5 % mas halto di loke ley ta prescribi. E aumento cu señor Eman a priminti, e aumento di Awg. 700,- pa luna den 100 dia, ta costa 180 miyon florin. Por lo tanto, e argumento di señor Eman, cu ta pasobra a uza 20 miyon florin pa baha tarifanan di impuesto pa 28 mil ciudadano di nos pais, a strob’e den su plan pa bay gasta 180 miyon florin, no tin logica.
“Mi recomendacion na señor Eman ta pa drenta den gobierno, traha pa crea su espacio financiero pa e cumpli cu su promesa haci durante campaña pa hisa pensioen di biehes cu Awg.700,- pa luna. Mi ta recomenda señor Eman tambe, pa no tuma otro gobernante na malo pa tuma desicionnan cu ta den beneficio di 28 mil ciudadano di nos pais cu no ta pagando e impuestonan aki mas den cual tin 17 mil pensionado.
E decision di rebaha impuesto tawata un bon decision di cua mi ta hopi orguyoso cu Gabinete Wever-Croes a logra hacie. Nos ta keto bay den surplus cu ainda ta mas halto di loke ley ta prescribi por lo tanto no tin nada cu por stroba e decision aki mas, especialmente cu e cifra di crecemento economico cu pa e aña aki ta bay ta asina positivo”, Prome Minister Evelyn Wever-Croes a enfatisa.
