Pa uzo di Carnavalistanan y tambe autoridad
- Tambe lo pone borchi grandi di ‘Toilet Publico’
ORANJESTAD (AAN): Pa di dos aña consecutivo, DOW lo no tin tent (‘gazebo’) pa huur pa esnan cu ta hayando Kavel riba Lloyd G. Smith Boulevard. Esey ta loke Daryl Lue, kende ta Hoofd Beheer Infrastructuur di DOW a confirma den un entrevista.
El a splica cu esaki ya a socede durante Carnaval 70 di aña 2024, ora cu e cantidad di tent na DOW a bira limita. Tur esnan bunita di antes di ‘Aruba’ riba nan, a deteriora y no por wordo usa mas.
Den pasado DOW tabatin un total di 120 tent, sinembargo e material di canvas a deteriora.
Esey a pone cu awendia DOW a resta solamente 20 tent, y esakinan ta wordo poni pa cierto instancianan, sinembargo no ta resta nada pa asina por huur cu pueblo cu ta bay para banda di caminda. Tin intencion pa laga Ministerio di Cultura den futuro keda encarga cu e tentnan aki.
Ademas di esey, a bin cu algun linea di maneho nobo pa esnan cu ta haya kavel riba Lloyd G. Smith Boulevard, esta pa mirones di Carnaval cu lo bay ta parando riba Linear Park. Tin hopi regla estricto, riba e.o. ki tipo di material por pone eyriba pa evita cu esakinan ta bay daña e trabao di klinker poni eynan.
DOW ta haci su trabaonan di pone heki pa mantene e area safe. Semper esnan cu haya kavel ta ricibi informacion con grandi nan por pone nan tent riba Linear Park, etc.
DIARIO a compronde cu pa aña 2025 aki ta bin cu e hekinan atrobe, sinembargo toch lo tin un cambio, unda ta bay crea 3 pa 4 “salida”, y esaki lo wordo coordina hunto cu Cuerpo Policial di Aruba. Lo bay papia con pa haci esaki mihor.
E ‘salidanan’ aki ta pa ora cu Polisnan haya cu personanan cu no ta coopera durante e Parada, y cu nan ta wordo aresta, of nan ta wordo ordena pa sali di e ruta. Pesey e ‘salidanan’ aki lo wordo usa como un ‘Exit-Strategy’ pa autoridad. E salidanan aki no mag di wordo blokea door di publico.
E salidanan aki lo wordo reforza cu borchinan grandi di ‘EXIT’ cu ta sirbi no djis pa autoridad, sino tambe pa comunidad cu diripiente ta stagna den e ruta y por mira unda nan por sali trankil cu nan famia y nan ice-jug, etc.
Segun Daryl Lue di DOW, esaki ta formando parti di un proyecto piloto. Nan ta pensa cu e borchinan “EXIT” visibel aki lo bay ta den e Parada, y di leu e oficialnan di Polis, of di Rode Kruis, of otro personanan di leu por mira unda tin un salida for di e ruta.
El a splica cu DOW lo bay pone borchi grandi tambe pa indica tur participante di Parada den Carnaval of mirones, na unda lo bay tin ‘Toilet Publico’. Pasobra ora cu bo ta den e ruta, cu tur trailer na banda, etc., abo como participante no tin bista claro ta unda e Toiletnan Publico aki ta, y pesey e borchinan aki lo bay yudabo grandemente.
