Ombudsman Jurima Bryson:
“No mester ta inscribi na Censo ni ta legal
ORANJESTAD (AAN) — Señora mr. Jurima Bryson, Ombudsman di Aruba, a splica den entrevista cu DIARIO, cu Ley ta papia di “Burgers”. E Ley ta sigui splica mas adelante, kico e palabra burger ta nifica. Esaki kiermen tur.
“E personanan particular, hasta e instancianan cu a wordo nombra den ley, por entrega un keho contra otro. Kiermen, e ta tur hende. Bo no mester ta inscribi na Aruba, bo no mester ta legal, tur hende por entrega un keho cerca Ombudsman.
Despues, Ombudsman ta bay analiza si e keho ta cay den e cuadro di su ley, si e ta contra e instancianan cu ley ta nombra y si Ombudsman, e ora ey, por trat’e.
“Kiermen, instancianan priva cu no tin nada di haber cu gobierno of cu no ta ricibi fondonan publico, eseynan Ombudsman, lamentablemente, no por trata.
Pero si bo ta cay den e cuadro di ley, Ombudsman lo bay investiga y duna un ayudo pa purba resolve e conflicto cu a cuminza eynan”, mr. Jurima Bryson a señala.
E dama a indica cu enberdad e culturanan den Reino ta diferente, pero e servicionan cu Ombudsman ta duna den Reino ta keda mesun cos.
