Tin scarcedad di parkeerplaats den Oranjestad pero mal uzo tambe ta tuma lugar

Marlon Croes, DOW papiando di desaroyo di centro di ciudad: - ORANJESTAD (AAN):   Un aspecto importante cu mester evalua ora cu ta papia riba desaroyo di Oranjestad ta e asunto di parkeer.

E problema di parkeer ta uno grandi. Tin scarcedad di parkeerplaats den Oranjestad, pero un mal uzo tambe ta tuma lugar, asina Marlon Croes, director di DOW a duna di conoce.

Estudionan haci ta mustra cu hopi di esnan cu ta traha den caya ta coy e mihor spotnan mainta tempran. E personanan cu ta cumpra y cu ta pone e florin core no ta haya lugar pa para.

Akinan tin cu busca un ekilibrio y wak conhuntamente cu sector priva cu sector publico con ta bay dune contenido, con e maneho mester ta y kico ta mihor pa ambos partido.

Kiermen mester revalua e proyecto aki pa wak con por sigui dilanti, Marlon Croes a indica.

Ora cu ta bay renoba e edificio di Nicky Habibe, cu un parti di dje ta bay bira vivienda, mester dune su facilidadnan pa estacionamento tambe sino e no ta bira atractivo pa e cumpradornan, a declara.

Tambe mester mira e parkeerplaats patras di Arubus como un lugar potencial pa bira e parkeer garage. Na final di caya tambe ta pensando pa cumpra algun edificio of percela pa crea espacio pa un parkeerplaats pa sector priva conhuntamente cu gobierno.

Tur esaki ta trabaonan cu tin cu wordo haci entre sector priva cu gobierno, Croes a remarca.