ORANJESTAD (AAN) – Den conferencia di prensa di gobierno, dialuna cu a pasa, Minister Presidente a expresa su gratitud pa tur e personanan cu ta cuida nan mes y nan famia, durante e pandemia di Covid-19.
Tambe el a gradici e front liners pa nan trabao desplega durante e temporada dificil di Covid-19. Den e cuadro aki, e mandatario a declara, su persona hunto cu Minister di Salud Publico a haci un bishita na Hospital, y a pidi e director pa nan pasa y gradici e personal di hospital cu a yuda asina bon durante e pandemia.
“E palabranan cu mi a comparti cu nan ta: ‘danki pa nan esfuerzo, sacrificio y trabao duro nos como gobierno por a maneha e crisis aki miho’. Pasobra, manera tur hende sa nos ta midi nos mes na kico ta nos capacidad na hospital. Momento cu hospital tabata yen, intensive care tabata yen, nos mester tabata mas estricto cu nos reglanan. Esey nos a bay gradici nan. Nos a haya un recorido desde cu e pashent yega na emergencia y kico ta e trayectoria cu e ta pasa eynan, despues bay riba sala y na Cuido Intensivo si tabata tin mester. Nos a wak tur esaki y nos por a combersa tanto cu enfermeronan como cu e docternan cu a haci un tremendo trabao tur e tempo aki, y nos a sinti pa bay personalmente, gradici nan pa esaki”, e dignatario a reitera.
Prome Minister a agrega cu hunto cu su colega di Salud y Turismo, a bishita diferente hotel pa gradici nan empleadonan pa nan trabao y e sacrificionan cu nan tambe a haci, pasobra con cu bay bin e sector di turismo ta esun cu a wordo afecta mas fuerte. Siguientemente nan a sigui nan recorido na e instancianan di orden publico.
“Y nos ta sigui den recuperacion. E recuperacion economico, manera siman pasa nos a papia di dje extensamente, despues di esey nos a cuminza enfoca tambe entre otro, riba e centro di ciudad na Playa unda nos tabata tin un encuentro cu tur e stakeholders unda cu nos a presenta nan e vision cu gobierno tin, pero mas importante ainda kico gobierno a haci caba como catalizador di un desaroyo den centro di ciudad y kico nos ta spera di nan. E tabata, por cierto, un bon combersacion”, Prome Minister a expresa.
Dialuna cu a pasa e mandatario a para keto riba e tema di recuperacion laboral unda cu e bon noticia ta cu mas y mas hende ta hayando trabao y ta importante pa comparti esaki cu comunidad, segun Premier Wever-Croes.
E ta corda cu aña pasa, para den e mesun lugar den sala di prensa, el a bisa cu e crisis aki ta bay pasa, ya cu Aruba a confronta hopi reto y surpasa nan, y esaki ta e caso tambe aworaki, danki na esfuerzo di nos tur, e mandatario a expresa.
