Señora Monique Giel-Labad di Wit Gele Kruis:
ORANJESTAD (AAN): Señora Monique Giel-Labad di Wit Gele Kruis a expresa den un entrevista cu DIARIO su preocupacion pa e falta di conocemento cu hopi hoben na Aruba tin tocante malesanan transmiti sexualmente. Segun e, durante consultanan individual y tambe den charlanan na scolnan, hopi hoben ta haci preguntanan cu ta mustra cu nan conocemento ta limita principalmente na HIV, mientras cu nan no ta na altura di e otro diferente malesanan transmiti sexualmente.
Segun Señora Giel-Labad, educacion ta esencial, pero conocemento so no semper ta suficiente pa preveni situacionnan di riesgo. El a splica cu ora un hoben ta bou di influencia di alcohol of droga, hopi biaha nan no ta pensa riba e consecuencianan di nan decisionnan sexual.
El a indica cu varios hoben cu a bin consulta cerca dje, tabata contagia cu un malesa transmiti sexualmente. Den e casonan di infeccionnan bacterial, tratamiento adecua a logra cura e hobennan. E casonan, cu ta wordo maneha den estricto confidencialidad, ta sirbi como ehempel real pa otro hobennan, pa nan comprende cu esakinan ta problemanan cu ta pasa na Aruba Aruba.
El a agrega cu cada aña Wit Gele Kruis ta ricibi peticionnan di diferente scol, specialmente pa duna charla na alumnonan di klas 6 cu ta prepara pa pasa pa scol secundario. Aunke e enfoke principal hopi biaha ta embaraso hubenil, e presentacionnan semper ta inclui informacion amplio tocante malesanan transmiti sexualmente. Segun e, e meta ta pa prepara hobennan cu conocemento suficiente pa reconoce e riesgo, compronde con infeccionnan por wordo transmiti y identifica posibel señalnan cu por indica cu nan mester busca asistensia medico.
Ademas di informacion medico, e charlanan ta dedica atencion na desaroyo di habilidadnan pa tuma decisionnan responsabel. Señora Giel-Labad a enfatisa cu ta importante pa hobennan siña con pa reconoce situacionnan den cual nan por wordo presiona of manipula pa tene relacionnan sexual, sea door di un mucha homber of un mucha muhe, y con pa pone limite y proteha nan mes.
El a indica tambe cu Wit Gele Kruis ta dedica atencion special na muchanan cu ta bin di famianan vulnerabel. Segun e, hopi di nan ta busca atencion y aceptacion riba caya, loke por haci nan mas vulnerabel pa tuma decisionnan cu por afecta nan salud y futuro. Tambe tin hoben cu ta comparti cu na cas nan no ta haya suficiente atencion ni guia di nan mayornan tocante sexualidad, aunke nan ta busca e atenciona aki pero nan no ta mira e interes den nan mayornan.
Como mensahe final, Señora Giel-Labad a haci un yamada na hobennan pa no keda cu duda of miedo, sino pa busca informacion confiabel y tuma contacto cu instancianan competente ora nan tin preguntanan, sospecha cu nan por tin un malesa transmiti sexualmente, of simplemente tin necesidad di orientacion y apoyo.
