Grislynn Hernandes, directora:
- Na Casibari pa 8’or
ORANJESTAD (AAN)-- Señora Grislynn Hernandes, Presidente di Fundacion “Venearuba Solidaria, la Casa del Venezolano”, a declara den entrevista cu Matutino DIARIO, cu nan tin un evento planea pa recauda fondo pa cumpra e luz solar pa ilumina nan plaza, pero debi na e catastrofe cu ta embarga nan como Venezolano aki na Aruba y na Venezuela, nan a dicidi pa canaliza e fondo como ayudo humanitario, cu nan ta rekeri na Venezuela.
Nan a papia cu esnan cu lo participa den e evento, y nan a bay di acuerdo cu awo mas cu nunca mester duna apoyo na Venezuela.
E sa cu tin hende na Aruba cu kier yuda p’esey el a haci un yamada na personanan cu tin barco, pa yuda nan pa transporta ayudo humanitario via maritimo, pa Venezuela.
E mes lo biaha pa Punto Fijo Diahuebs otro siman, via Caracas, y e ta haya cu por coordina esaki directamente. El a bisa cu nan a yega di haci esaki den pasado, unda nan a manda ton di cuminda y co’i hunga pa Venezuela, y el a fungi como observador pa e articulonan yega na unda nan mester a yega. Esaki no ta e caso awo si no ta necesario.
E ta yama danki na Gobierno di Aruba cu a habri e frontera aereo pa e parti humanitario, y e ta na haltura cu Gobierno Hulandes tambe ta haciendo esaki posibel, pero e no sa si a wordo habilita un lugar como centro di deposito, cu lo tabata e mas idoneo, pasobra un persona por a controla si tin productonan cu por a caduca, pero e no sa si gobierno tin pensa algo asina of tin’e na bista. E evento lo ta awe na Casibari, pa 8’or, y tur hende cu por hiba un aporte ta bay tin un urna eynan pa esaki. Mas informacion por yama telefon 745-7501. Adres ta Italiestraat 24.
