Damara Rasmijn di Directie DOZ:
ORANJESTAD (AAN): Directie Ouderenzaken (DOZ) ta finanlisando ultimo detayenan pa e Fiesta den Cunucu pa nos Grandinan, cu lo tuma luga diadomingo 28 di juni na Santa Rosa. Señora Damara Rasmijn di DOZ a informa cu tur cos ta cla pa brinda nos adultonan mayor un dia inolvidabel, yen di cultura, entretenimento y bon ambiente den famia. E programa lo cuminsa cu un acto oficial cu presencia di dos minister.
Segun Señora Rasmijn, e programa lo ofrece un amplia variedad di actividadnan pa entretene tur presente durante henter e dia. E parti mainta, Grupo Kibrahacha Boyz lo duna nan presentacion musical. Ademas, cinco baluarte, adultonan mayor, kende a haci un contribucion importante na e sector primario di Aruba, lo wordo honra cu un reconocimento special.
Tambe lo tin un competencia culinario, organiza cu colaboracion di EPB San Nicolas, mientras cu e grupo di baile Young at Heart, compone di adultonan mayor, lo presenta un espectaculo special. Gucci Dancers lo participa un biaha mas cu baile tradicional y tambe lo tin un presentacion dedica na e celebracion di San Juan y Dera Gay. E programa lo cera cu presentacion di Banda Enkura, cu lo brinda musica folklorico y un ambiente alegre pa invita e publico baila y disfruta.
Señora Rasmijn a señala cu DOZ, hunto cu Santa Rosa, a percura pa crea un ambiente comodo y accesibel pa tur bisitante. Lo tin tent, mesa y stoel disponibel, ademas di un baño adapta pa personanan cu ta uza rolstoel.
Pa facilita e movilidad di nos adultonan mayor, esnan cu ta trece un adulto mayor por uza e parkinglot paden di Santa Rosa. Si e parkinglot ta yen, nan lo por drenta pa baha e adulto mayor cerca di e actividad, evitando cu nan mester cana mucho. Considerando e calor, EMS Aruba lo ta presente durante henter e evento pa brinda asistencia den caso di cualkier eventualidad.
Durante e dia tambe lo tin varios venders, incluyendo diferente grupo di adultonan mayor, cu lo ofrece nan productonan pa recauda fondo pa sostene nan actividadnan. Organizacion ta recomenda bisitantenan pa trece placa cash, ya cu no lo tin facilidad pa paga cu tarheta. Tambe ta conseha pa trece un saco pa carga e articulonan cu nan cumpra.
Directie Ouderenzaken ta haci un caluroso invitacion na henter comunidad, y particularmente na nos adultonan mayor y nan famianan, pa participa na Fiesta den Cunucu pa nos Grandinan, diadomingo 28 di juni, for di 9:00 di mainta te 2:00 di atardi na Santa Rosa, y disfruta hunto di un dushi dia pa celebra nos cultura, tradicion y e aporte balioso di nos grandinan.
