Tin plannan den preparacion pa renovacion di Eagle Beach

Marlon Croes, director di DOW:

ORANJESTAD (AAN)—Den un entrevista cu director di DOW, Ing. Marlon Croes, el a menciona cu e plannan di renovacion di Eagle Beach ta den preparacion, y e diseñonan ta cla. Nan ta trahando riba e informe cu mester entrega na gobierno, pa pidi e fondonan necesario pa nan wordo aloca, pa por bay destaho publico. Aworaki nan ta bezig riba trabaonan di mantenimento di cual parti pariba di e caminda ta wordo haci door di “Watty Vos Boulevard Project Company”, y DOW ta haci e parti pabao, unda cu a combersa cu DOW su ekipo pa nan haci nan trabao mas intensivo.

            Ing. Croes a indica cu e espacio cu nan tin ta hopi limita y tin cu haci uso di dje. Eagle Beach a wordo califica como un di e miho beachnan den Caribe y na mundo y mester cuide, pa evita cu ora tin awacero tin drenahe di awa di caminda cu ta subi beach y ta piki sushi.

            Loke nan ta premira ta pone un sistema pa e awa cu sushi no yena den beach, pero guie pa e bay den rooi y den un caminda pa bay pa lama, y asina tin diferente faceta den e proyecto aki.

            Den e caso aki, Ing. Croes a indica, nan ta bin mantene Eagle Beach cu Faldero, cu ta pasa dos bez pa siman cu machine, teniendo cuenta cu e temporada di tortuganan y cu e beach keda den bon forma.   Pero e contract a caba, a vence na Mei ultimo y DOW ta den combersacion pa bin cu un contrato nobo, unda cu nan tin sosten di no solamente DOW sino otro departamento y stichtingnan pa yuda cu e fondonan. DOW, den e renovacion lo enfoca riba e parti infrastructural pero no esun di awa.

            Lo bay tene cuenta si pa hiba e awa na rooi, den e proceso pa evita cu e lo subi beach, pero tin otro master plan den proceso pa colecta e awa den e rooi mas ariba, pa asina menos awa ta yega e beach.