Un wega peligroso di cifra ta wordo presenta na publico
- 1.6 Biyon di Old Guys di AVP tabata e wega sin control
- Gobierno no por gasta placa sin autoridad di Parlamento
ORANJESTAD (AAN)- Na momento cu Gerlien Croes a dicidi cu e ta bandona e partido AVP, el a haci uzo di e hecho cu e caso di Benny Sevinger a alcansa un punto cu ningun hende ni partido cu ta respeta su mes y ta respeta Pueblo, por sostene presencia di Benny Sevinger den Parlamento.
Sinembargo, na momento cu Gerlien Croes a bira participante di AVP den e panorama politico di Aruba, el a duna credito na e grupo cu awe ta wordo yama Old Guys, pero ta e grupo di AVP cu el a acepta y a brasa como politico ora el a subi lista di AVP.
Nos a tuma nota di informacionnan riba tereno financiero cu ta wordo presenta dor di mr. Gerlien Croes, cu ta lansa un misil politico contra BBO na frontera.
Nos mester claramente dilanti cu nos ta contra tur BBO mescos cu nos ta kere tur politico mes tambe ta personalmente pasobra politiconan tambe mester paga BBO y tur otro belasting cu un Pueblo conoce.
Gerlien Croes ta atende na su forma cu e introduccion pues di 7 porciento di BBO na frontera dia Prome di Augustus cu lo hinca 20 Miyon extra den caha di Gobierno pa 2023.
Gerlien Croes ta basa su mes riba e presupuesto supletorio cu recientemente a yega Parlamento y riba cual por a haci pregunta pa wordo trata despues di vakantie di Parlamento.
E hecho cu Miembro di Parlamento Gerlien Croes tin e presupuesto supletoroio den su man ta papia un palabra bon cla, cu no ta Gobierno ta dicidi kico ta pasa cu placa di Pueblo pero Parlamento.
Ningun cent di Pueblo por wordo gasta sin aprobacion di Parlamento a menos cu Parlamento sigui e ruta di abuso cu a wordo implementa dor di e partido bieu di Gerlien Croes, cu no tabata tin problema pa drenta e partido AVP, cu tabata e partido cu a kibra Aruba cu e proyectonan PPS di “Bo Aruba” cu a wordo ehecuta sin necesidad di Parlamento pa dicidi si ta bon of no ta bon pa gasta e placa.
Awe durante vacacion di Parlamento, Gerlien Croes ta uza e cifranan di e Presupuesto Supletorio pa crea pafor di Parlamento un situacion politico cu mester wordo discuti den Parlamento cu mester bay di acuerdo cu e Presupuesto Supletorio.
Gerlien Croes ta hunga cu cifranan di Dos Miyon diferencia por ehempel den e presupuesto supletorio, cu ta e calculacion di cifranan cu ta ahusta e cifranan original cu mester wordo uza prome cu un aña cuminsa y aproba dor di Parlamento pasobra sin aceptacion di Parlamento ningun cent por wordo gasta.
Den un tempo di vacacion di Parlamento, Gerlien Croes ta cuminsa atende cifranan cu e mester atende den seno di Parlamento pasobra ta den Parlamento e cifranan aki ta bira realidad.
Kico ta e furia di e momento aki, si decision di loke ta pasa cu e cifranan cu Gobierno a presenta, ta den man di Gerlien tambe ora e cifranan wordo trata?
Kico Gerlien Croes kier proba aki?
Cu Aruba lo tin mas entrada cu e tin gasto? Cu Aruba por paga su debenan cu por lo pronto e lo no termina di paga pasobra ta riba termino largo mester paga nan?
Unda problema financiero di Aruba a origina?
Caminda e cuna di Gerlien Croes den politica tabata. Den e partido pa medio di cual Gerlien Croes a haci su entrada y hasta a wordo mira como posibel reemplasante di Mike Eman den futuro.
E wega cu a wordo lansa aki ta peligroso na un momento cu Hulanda ta trata na tur forma pa demostra cu Aruba mester cay bou supervision.
Nada por pasa cu placa di Aruba a menos cu Parlamento dicidi. E momento cu Parlamento no tabata tin nada di bisa ta tempo cu e partido pa medio di cual Gerlien Croes a drenta politica, AVP, a entrega Mike Eman y Benny Sevinger, 1.6 Biyon di Pueblo pa sin control ni intervenencia di Parlamento nan uza.
Politica mester midi su responsabilidad enfrente Pueblo sigur na momentonan clave den Reino cu ta exigi un frente uni di Aruba enfrente loke lo alcansa Aruba den e situacion confuso di Hulanda.
