E 'World Economic Outlook October 2023' di IMF ta indica cu economia di Aruba ta den e bon direccion

Minister Geoffrey Wever:

ORANJESTAD (AAN):  Segun International Monetary Fund (IMF) economia di Aruba den 2023 ta premira e Producto Interno Bruto (PIB), e indicador cu ta refleha e balor di tur producto y servicio produci di un economia, pa crece cu 8,0 porciento (+8.0%) den termino nominal.

            Cu un balor di 6.8 miljard Florin, esaki ta igual na 113 porciento (113%) di e nivel na 2019 (6.1 miljard Florin). Pa loke ta trata inflacion, IMF ta premira cu inflacion den 2023 lo yega 4.5 porciento (4.5%).

            E crecemento di economia di Aruba lo sigui tambe den 2024. IMF ta premira un crecemento di 3,4 porciento (+3.4%) den termino nominal di e Producto Interno Bruto cu un balor di 7.0 miljard Florin. Esaki ta igual na 117 porciento (117%) di e  nivel na 2019. IMF ta premira un inflacion di 2,3 porciento (+2.3%) den 2024.

            E Producto Interno Bruto (PIB) den termino real, esaki ta balor di tur producto y servicio produci di un economia ahusta pa inflacion tambe ta mustra un desaroyo positivo. Den termino real, IMF ta premira cu e Producto Interno Bruto den 2023 lo crece cu 2,3 porciento (+2.3%) y den 2024 cu 1.2 porciento (+1.2%).

            E World Economic Outlook October 2023 di IMF ta indica cu economia di Aruba ta den e bon direccion, un desaroyo positivo cu ta demostra cu e economia a supera e impacto economico di e pandemia.

            “E crecemento di economia di Aruba den 2023 y 2024 premira pa International Monetary Fund ta duna mas confianza pa sigui inverti den desaroyo di nos pais”, segun minister Geoffrey Wever.