Entrega Arubianonan y mundo un paraiso cu un virus a ataca - *Cada dia cu porta di turismo ta cera, e bienestar social ta wordo afecta - *Cada dia cu porta di Aruba ta habri, un peliger pa salud por drenta
ORANJESTAD (AAN) — Otro siman Pueblo di Aruba mester dicidi, con e ta huzga e gobernacion di Aruba entre 2017 y 2021.
Uno di e eleccionnan mas crucial den historia di Aruba ta bati na porta pasobra na momento cu Pueblo di Aruba bay urna electoral, e ta dicidi con contenido lo wordo duna na futuro cu a basha abou na 2020.
Dangui Oduber tabata ocupa cu dos cartera cu den exigencia ta confronta otro. Pero ambos ta directamente relata na e nivel di bida di ciudadanonan.
Cuido medico mester sigura e bon salud di e Pueblo Arubano, biba na un isla chikito cu segun cifra lo mester di un cuido medico restringui na e capacidad di cuido pa cual e habitante directamente por paga.
E nivel di bida di Aruba ta hopi exigente compara cu por ehempel comunidadnan na un continente.
Si tuma por ehempel Hulanda, por mira cu aldeanan cu mes tanto habitante cu Aruba, no ta dispone di e base di cuido cu Aruba como isla, como pais, ta ofrece.
E nivel di cuido medico tur tempo tabata importante pa sosten di e entrada di e pais na turismo, cu ta un pilar economico. Ta e nivel halto di bida y di cuido medico cu Aruba conoce, ta aporta pa turismo cu ta entrada pa Aruba.
Na 2020 e garantianan financiero di e pais pa prestacion halto den Salud Publico a basha abou.
Pago pa cuido medico di Aruba ta depende di AZV, e seguro medico general cu ta wordo cobra pa medio di entrada di ciudadanonan y na cual Gobierno di Aruba tambe mester aporta.
Na e momento cu hopi trahado a keda sin entrada, e base financiero di AZV directamente a wordo afecta na momento cu Covid-19 tabata exigi capital pa scapa bida di e Arubiano.
Awe Aruba ta prepara pa bay urna electoral.
Ora Pueblo acudi na urna electoral, e ta realisa e maneho cu mester a implementa pa scapa bida di e Arubiano? Ora Aruba bay depone su vota e ta realisa kico tras di cortina mester a wordo haci pa mantene e producto turistico Aruba intacto y alerta pa asina na momento cu tabata posibel, introduci turismo segun normal nobo?
Awe Ministro Dangui Oduber ta representa e dos sectornan cu a percura pa e Arubiano por a enfrenta e peliger pa su salud pero na mes momento a haci tur loke ta necesario pa, na un forma nobo y responsabel, Aruba cuminsa saluda turistanan cu ta trece e placa cu Aruba mester pa su economia keda na bida, pa tin pan riba mesa y por sigui traha riba futuro di e pais y tambe cubri gastonan medico.
Riba tereno medico sigur lo tin hopi pa atende. Sigur e gastonan di cuido, compara cu e placa cu AZV ta genera, mester wordo discuti.
Den e temporada tras di lomba, den pandemia a mira Imsan habri su porta como un segundo hospital na San Nicolas. Aruba a conoce trankilidad den gerencia na Hospital.
Pa DIARIO tabata sumamente importante cu AZV ya no ta un asunto cu politiconan so ta studia y dirigi pero cu awor e sectornan di dunado di cuido ta papia directamente di e necesidadnan cu mester wordo financia den un normal economico, financiero y social nobo.
Na momento cu na 2017 Dangui Oduber a acepta e encargo di Ministro encarga cu turismo pero tambe cu cuido medico como ala di Salud Publico, e no por a mira e reto grandi.
E forma cu el a atende e asuntonan si ta papia pa su mes. E no tabata un “solo player” pero a reconoce necesidad di participacion amplio cu awe ta habri caminda pa e realidad di cuido medico y su exigencianan financiero bini na luz mientras ta traha riba un economia nobo cu mester crea trabou cu lo produci entrada pa AZV.
E temporada di gobernacion 2017-2021 ta cera. Pa Aruba dicidi conscientemente mester por huzga loke e temporada a exigi sigur ora un gobernante ta atende cu dos ministerio den cual bienestar economico y financiero por dal contra e bienestar di salud di Pueblo.
