Jessy Ras, coordinador:
Jessy Ras, Coordinador di e Trayecto di Formacion Social (SVT) ta contento cu e grupo 18 ta bezig cu e fase final di e trayecto, cual nan ta termina na Augustus proximo, y Jessy a cuminza prepara nan caba pa nan siguiente stap, kico nan kier haci despues, sea bay scol bek of haya un trabao, etc.
Grupo 19 a caba di cuminza cu e fase 2, na final di Juli ta inicia nan periodo di stage, y nan ta bayendo bon, ainda motiva y net awo SVT ta atendiendo cu inscripcion pa e grupo 20, cu ta cuminza dia 18 di Augustus. Hobennan interesa por acerca Mariniers Kazerne, SVT mas pronto posible, Jessy Ras a bisa.
SVT ta un opcion pa hobennan cu a keda sinta na scol y cu kizas kier un break, aki, durante un aña, nan ta bezig, por haya diferente training, disciplina, structura si nan no tin e, nan ta siña con pa traha den team, nan ta siña ademas kico ta un trabao, tin biaha muchanan cu ta caba MAVO no ta haya un stage, na SVT ta bay core stage den un aña largo den stap 2, y nan ta haya “tips & tools” con pa crece nan mes mihor den diferente ramo di nan desaroyo.
“Pues, pa esnan cu no a caba scol, of nan no sa kico pa haci, den ki direccion pa bay, pero no kier sinta tras di un banki mas, SVT ta un oportunidad unda nan ta haya idea, hasta motivacion pa nan sigui opleiding militar, y por drenta den e seleccion pa Arumil”, Jessy Ras a comenta.
El a agrega cu no falta hopi mas pa SVT cera e inscripcion y tambe nos ta akinan pa duna informacion of invita e hobennan, of mayornan cu tin yiu entre 17 te cu 25 aña. “SVT ta un bon opcion”, Jessy Ras, coordinador a reitera.
