Comision 11 buscando pa sa unda 382 mil Florin a desaparece
ORANJESTAD (AAN): Despues di a reuni riba Dialuna, e di Comision 11 a aproba e siguiente relato cu ta sali aki den DIARIO.
Gregorio Wolff na nomber di nan, a splica cu “Comision 11” ta un conhunto di 11 miembro di CAPA, kendenan ta buscando e berdad tocante e ladronicia di 382.000 Florin for di miembronan di CAPA.
Segun Comision 11, tin hopi pregunta cu sra Brito mester contesta, di su maneho den SEPPA y Tesorero di CAPA. E Secretario general di SEPPA como lider maximo di SEPPA ta destruyendo reglanan correcto di democracia cu nos tabata conociendo.
Si tuma na consideracion loke a pasa den e Cooperativa di Miembronan di SEPPA, CAPA, tocante un ladronicia di 382.000 Florin. Comision 11 a pidi e register di miembronan, di acuerdo cu statutonan di CAPA, pa yama reunion cu miembronan. Directiva di SEPPA a para ariba un NO. Comision 11 a bay Corte y Corte a dicta cu comision 11 tin rason pasobra e ta para den statutonan di CAPA. Tambe e landsverordening cu ta regarda Cooperativismo en general, tin mesun stipuacion, di acuerdo cu e otorgamento di e registro di miembronan.
E motibo pakico Comision 11 kier e registro di miembronan, esaki pa di acuerdo cu statutonan yama un reunion cu directiva di CAPA pa nan duna cuenta y mas detayenan di un ladronicia di 382.000 Florin. Directiva di CAPA, cu su Tesorero, sra Brito cu sigur tin e bos mas grandi den directiva di CAPA, nan ta bay apela e caso.
Apesar cu e decision di Juez ta bisa cu entrega di e registro ta para den e statutonan di CAPA;
Den e ley, landsverordening op Cooperatieve Verenigingen AB 1987 no. GT8, tabata un ley na Antiyas prome cu 1986, despues a bira ley na Aruba y cual ley ta stipula e reglanan cu Cooperativanan mester eherce. Den articulo 11; lidD; 3, e entrega di e register di miembronan tambe ta parti di esaki.
Toch directiva di CAPA ta dicidi di bringa e decision di e Jues y e ley cu ta regarda stipulacionnan den Cooperativismo, den corte di apelacion. Nan no tin ni e minimo chens pa empata, corda pa kibra e decision di Juez y kibra un ley existente. Loke tur hende mester analisa ta cu nan no kier pa e claridad ariba e robo di 382.000 Florin sali. E pregunta grandi ta, kico tin scondi eytras?
Awor tin e menaza di un hurista, consehero hudicial di SEPPA y CAPA, den direccion di miembro(nan) di Comision 11. E hurista aki kende pa motibo di a comete delito(nan) a ser saca for di Orden di Abogadonan. E no tin autoridad mas como abogado, pero toch ta menaza y pretende hasta di lanta caso contra miembro di comision 11 den corte.
Ora nos analisa e situacion, ta bisto cu tur cos ta draai rond di e ladronicia di 382.000 Florin. Tesorero di CAPA = Magaly Brito = Secretario general di SEPPA cu e añanan sin directiva, sin control financiero, sin decharge y cu un hurista cu a ser saca for di abogacia, e proverbio Hulandes SOORT ZOEKT SOORT ta na su lugar. Quo Vadis SEPPA/CAPA!
Tambe tur e sucedidonan aki ta pone hopi hende pensa cu loke ta pasando den SEPPA y CAPA ta pa crea un cultura pa accepta impunidad como algo legal y normal. No Por, Nos di comision 11 ta lucha pa para e cultura malo aki.
Informacionnan di Secretario General di SEPPA M. Brito ariba directiva for di 2016. Ta bon pa tur hende tuma nota di e revistanan di SEPPA, e ultimo añanan. Den e revista di december 2016 ta para bao punto 2. Directiva: Sra S. Rietwijk, sra J Maduro, sra J Rasmijn y M Orman, nada mas.
E compañeranan aki a worde eligi den congreso anual di 2013, nan a ser eligi pa 3 aña, e ultimo aña cu tabatin eleccion pa directiva di SEPPA, nan periodo como miembro di directiva a termina cu e congreso di 2016 na november 2016. Pues ta informacion incorrecto pasobra, segun statutonan di SEPPA, na december 2016, nan no por ta miembro di directiva mas. Nan tempo a yega y mester a tene otro eleccion.
Den revista di december 2017 ta poni cu Directiva no a keda cla cu e cantidadonan pa eleccion directiva nobo. Manera keda dicidi, e directiva a keda ehecuta e trabaonan hunto cu Comite Ehecutivo. No por, segun statutonan no a eligi directiva. Pues no tin directiva, ademas directiva no ta ehecuta, pero ta controla e maneho di Comite Ehecutivo. Directiva ta eherce e trabaonan di Control, Checks and Balance.
Den e revista di 2018, ta poni ariba pagina 3, cu “Directiva no a logra haya e cantidad di candidatonan pa eleccion directiva nobo”, e fecha cu a keda proponi mester a keda cancela pa falta di mas candidato.
Ta Comite ehecutivo su trabao e ta pa busca candidatonan pa directiva.
Den e revista di december 2019, ariba pagina 2 ta poni cu Directiva ta manda su saludonan di Pasco y Aña nobo 2020. Un directiva spiritu cu no ta existi ta manda saludo. Despues di 2019 no tin revista/Info di comite ehecutivo/Secretario General mas. Prueba palpabel cu e ultimo eleccion den SEPPA tabata den e congreso di 2013.
Papia berdad ta un virtud cu ta gana guera, cu gañamento semper bo ta perdi Ora nos lesa pagina 19 di DIARIO 11 juli 2025, Secretario Genera ta bisa, e.o. cu e ultimo añanan e directiva tabata hopi mas disponible pa entre otro bay den ehecucion di trabaonan tambe acudi na reunionnan hunto cu e Comite Ehecutivo.
AYNO, AYNO, despues di 2013 miembronan di SEPPA no a vota pa un directiva di acuerdo cu statutonan. Sra Brito ta lubida loke e a skirbi ariba pagina 11 di e mesun Diario, 11 july 2025, cu ta “Congreso =Delegadonan a pidi pa eleccion di directiva”, cual ta nifica cu no tin directiva. E posicion pa tene eleccion di directiva sigur ta basa ariba e criticanan den prensa cu SEPPA no tin directiva y tambe a base di informacionnan den e revistanan di SEPPA
