Awe Gobernador Alfonso Boekhoudt ta reuni cu Formadornan
ORANJESTAD (AAN): Parce cu awe ta bira un dia crucial pa loke ta formacion di e gobierno nobo pa Aruba . Awe tin riba agenda cu e dos formadornan, esta Mike Eman (AVP) y Gerlien Croes (Futuro) ta bay reuni cu Gobernador Alfonso Boekhoudt.
Esaki ta nifica cu tin un posibilidad basta grandi cu e formadornan lo presenta na Gobernador Boekhoudt e lista di ministernan di e gobierno nobo den coalision.
Tin indicacion circulando e siman aki cu e dos partidonan, AVP y Futuro, por a yega na un acuerdo y nan lo ta cla pa formalisa e acuerdo aki.
Tin varios version a circula di un posibel lista di ministernan, pasobra ainda falta e proceso di screening, cu lo ta parti di e gabinete nobo. Sinembargo, DIARIO ta warda pa esaki keda anuncia oficialmente. Toch mester carga un tiki pasenshi te ora cu e screening tuna luga y pa asina procede na e respectivo huramentacion.
Por a sinti den e dianan aki hopi expectativa den pueblo pa haya sa con e formacion di e gobierno nobo lo ta. E reunion cu Gobernador awe diabierna lo por trece mas claridad.
