Suspension di fondonan ta pone futuro di ayuda na imigrantenan na peliger

Merca a pone tur cos 'on hold'

*Decision ta impacta nan operacion y ta pone den riesgo proyectonan clave 

ORANJESTAD (AAN):  Organisacionnan no gubernamental cu ta dedica na yuda humanitario y asistencia pa imigrantenan, incluyendo HIAS Aruba, IOM, UNHCR, PADF y Fundacion Venearuba, ta confronta cu un reto grandi despues di recorte severo den nan presupuesto.

            E situacion aki ta trece incertidumbre riba e trabou esencial cu nan ta realiza pa e comunidad imigrante na Aruba.

            DIARIO a haya sa cu e suspension di fondonan por limita of hasta stop algun servicio crucial cu e organisacionnan aki ta brinda. Esaki ta inclui yudansa huridico, apoyo psicologico, cursonan di entre otro idioma, tra'imerdia pa mucha y asesoramento pa imigrantenan y victimanan di trata di persona.

            CMMA (Coordination Center on Human Trafficking and Migrant Smuggling Aruba), por ehempel,  a expresa nan preocupacion tocante e desaroyo aki, particularmente relaciona cu HIAS Aruba, un socio clave den e asistencia na victimanan di trata di persona.

            CMMA a declara: "CMMA a ricibi informacion cu HIAS Aruba, un socio valioso den e asistencia na victimanan di trata, lo tin cu limita nan servicio debido na recorte severo di presupuesto.      CMMA ta sinti grandi tristesa cu esaki ta sosode y spera cu e problema di presupuesto por wordo resolvi rapido pa asina HIAS Aruba y CMMA por sigui traha hunto.

            E impacto di e suspension di fondonan no solamente ta pone e organisacionnan den un situacion fragil, sino tambe e comunidad vulnerabel cu ta depende di nan pa yuda y sosten. Mientrastanto, ta spera cu tin solucion rapido pa e problema aki, pa evita cu esnan cu ta den necesidad no wordo afecta negativamente.

            E comunidad y lidernan gubernamental mester reflexiona riba e impacto humano di e tipo di decision y busca alternativa pa garantisa cu e trabou crucial di e ONG-nan por sigui sin interupcion.

            Tur esaki ta den cuadro di e maneho nobo di e presidente di Merca, Donald Trump, ken a bin cu un decreto pa evalua con e fondonan aki ta wordo inverti. Inicialmente, ta papia di 3 luna di evaluacion, pero den e mesun rosea, e por dura mas largo. E intencion ta pa “reevalua y realinea” e financiamento cu e “interesnan mericano”.

            DIARIO a combersa cu un dirigente di un di e fundacionnan aki y el a laga sa cu por lo pronto, nan a stop nan trabaonan y tampoco nan ta hayando subsidio di e organisacionnan mericano cu ta pone fondonan disponibel pa realisa e proyectonan como pa paga salarionan na e personal.

            Merca ta e mayor donante global di asistencia internacional: den 2023, e Departamento di Estado y e Agencia di Estadonan Uni pa Desaroyo Internacional (USAID, na Ingles) a distribui 68.000 miyon dollar rond mundo.

            Sinembargo, e decreto ehecutivo recien di e administracion Trump a establece como “política” cu “ningun asistencia exterior di Merca por wordo distribui di un manera cu no ta completamente alinea cu e politica exterior di e presidente”.

            E noticia di e suspension di fondo a causa hopi reaccion na Latino America y Caribe, cu den 2024 a ricibi 2.500 miyon dollar den yudansa for di e administracion di Joe Biden.

            Tin expertonan internacional cu ta di acuerdo cu e suspension di e yudansa ta mina decadanan di progreso den e promocion di derecho humano, gobernacion democratico y stabilidad social den e region.

            E futuro di e iniciativanan aki lo depende awor di e buskeda di fuentenan nobo di financiamento pa evita e interupcion di proyectonan cu ta garantisa e trabao di hopi organisacion como tambe periodista den e region.