Aduana ta trahando den un edificio sigur y  cu miho ambiente cu ta yuda e departamento den su funcion

Director di Aduana Roderick Croes:

 *E lo sigui pusha D.O.W pa drecha y/of asfalta pafo 

ORANJESTAD (AAN) – Den entrevista cu DIARIO, e director di Aduana, señor Roderick Croes, a señala cu, manera ta conoci, e edificio cu nan tabata ocupa pa añanan, no tabata apto pa personal di Aduana traha, y mester a busca un solucion lihe.

El a splica cu desde 23 di Maart’24, nan a cuminza caba na sondia e posibilidadnan y na final di 2024 nan a logra drenta den e edificio unda nan ta actualmente, y por bisa cu nan a habri 2025 den un edificio sigur y den un miho ambiente.

Croes a indica cu, naturalmente, nan tin mester di algun espacio mas, pero manera cu e ta aworaki e ta yuda Departamento di Aduana den su funcion.

Señor Croes ta acepta si cu e caminda pa yega e edificio ta den hopi mal estado. El a bisa cu e ta pasa den dje tur ora tur dia y mescos e trahadornan y enberdad no ta mucho agradable pasa riba e caminda aki, “pero cu un poco pasenshi nos lo por yega na algo…” Croes a expresa.

E Director a comenta tambe, cu DOW a bin drecha e caminda ey caba den tres ocasion, a base di e peticion, pero e caminda ta daña hopi lihe. “Cu e frecuencia y cantidad di awacero cu ta cay, nos no por cu ne, pasobra e ta ocasiona pa e naturaleza, pero e ta pone, cu cada bez e caminda ta bay bek den mal estado”, señor Roderick Croes a bisa.

El a agrega cu atrobe e ta bezig cu DOW, ta manda nan email, p’asina wak con nan por haci na corto plazo y, naturalmente, e intencion ta pa sigui wak na con extenso nan por yega di asfalta full e caminda.

Señor Croes a comenta cu pa Aduana su trahadornan y e clientenan ta un prioridad pa drecha e caminda en cuestion.

“Pa nos tur eigenlijk ta hopi importante pa e caminda wordo drecha y/of asfalta. Na mesun momento nos a pidi pa haya un reunion cu DOW, y subsecuentemente cu tur e bedrijfs na Aruba, p’asina nos por wak con leu nos por yega pa asfalta e caminda. Pa Aduana ta importante, naturalmente gobierno no ta bay hinca placa pa Aduana so, debi cu e ta un gebouw cu ta temporal. Na final di dia nos kier bay muda for di akinan. No ta algo cu ta bay ta pa nos unicamente, e ta importante si pa e infrastructura di Aruba, pa tin un bon caminda, y pa tur otro companianan rond y tambe ora nos sali di akinan, pa esun cu lo drenta den e edificio aki”, señor Croes  a enfatiza.

E ta kere cu nan lo keda den e edificio actual te cu 2027. Pronto lo cuminza cu e transcurso pa e construccion di esun nobo, cual ta bay ta den fase, director di Aduana a duna di conoce.