Yvette Geerman a indica
ORANJESTAD (AAN): El a pasa algun biaha caba cu autoridad ta haci control na negoshinan cu ta bende cuminda, y bin topa cu trahadornan laborando cu no tin ningun clase di carnet di salud, conoci den pueblo como ‘carchi berde’.
Un di e motibonan cu nan no tin carchi, ta cu tin hopi trahador na Aruba cu ta aplica pa haya e carchi berde, pero despues no ta termina cu e proceso pa completa cu tur rekesito.
Yvette Geerman kende ta di Departamento di Higiena y Inspeccion di Alimento, a confirma cu nan a nota cu tin hopi trahador cu ta cuminza cu e proceso pa adkiri nan carchi berde, pero na caminda nan no ta finaliza cune pa obtene e carchi.
Nan ta yega na e Departamento di Gobierno pa asina aplica, y ora cu nan haya instruccion pa bay saca un X-Ray di nan Thorax, y tambe haci test fecal na laboratorio, nan ta keda sin haci uno di nan.
Tin biaha e trahadornan ta yega pa busca nan carnet, y nan ta bin cu excusa cu “basta tempo pasa” nan a haci e testnan ey caba. Ora di bay check archivo, esnan di e Departamento ta bin realiza cu un di e pruebanan obligatorio aki no a wordo haci.
Segun Geerman, nan ta topa situacion cu e trahadornan ta aplica, pero nunca ta haci e pago. Aunke bo a haci test di Thorax y test Fecal, si acaso bo no a haci pago claro lo bo no haya e carnet. E tin chens ainda pa bay haci e pago, pa asina e ricibi e carchi berde aki.
Fuera di tur esaki, ta presenta e situacion cu e trahador ta keha cu nan no a haya yamada pa bisa cu e carchinan a keda cla. Siendo cu esey no ta e forma di operacion na e Departamento aki. Ora cu bo aplica bo ta haya un splicacion cu asina cu bo entrega e test di laboratorio, cu lo dura 10 dia di trabao pa bo bay busca bo carchi full cla, y por ricibi esaki solamente riba Diabierna.
Claro ta e deber civico di cada trahador, pa percura pa e mes bay busca e carchi aki pa por cumpli cune. Si bo ta trahando den un negoshi cu ta atende cuminda, bo mester tin e carchi berde valido den bo poder. No ta responsabilidad di Departamento di Higiena pa keda yama trahadornan bay busca nan carnet.
E doño di trabao den cierto sentido tambe tin di ta al tanto, y keda vigilante pa check si tur trahador tin un carchi berde valido, y cu nan ta percura na tempo pa bay renoba esaki. Pasobra si acaso diripiente autoridad haci control y descubri cu por ehemplo tur su tres empleadonan no tin carchi valido, claro e ta haya ordo pa cera e negoshi pasobra e no tin reemplazante pa mantene e empresa habri. E por habri bek te ora cu tin hende cu carchi berde valido den nan poder. Pues e doño ta core riesgo di perde placa tambe. Y e doño di negoshi por haya un boet.
