ORANJESTAD (AAN): Tabata Diasabra marduga banda di 2:00 am, cu e conocido periodista multifacetico Eddy Peterson, mihor conoci como ‘Jan Poets’,
ta coriendo su Suzuki Carry-Van color blanco cu number A-45730 cu recien a caba di haya un capa nobo di verf riba dje. El a caba di haci grabacion di cobertura di un fiesta di Halloween den ballroom di Marriott Aruba Resort & Casino.
Banda di dje como pasahero tin Edson Tromp, kende ta e popular Discjockey cu a haya fama durante epoca di Club Scaramouche y Club Visage den decada di 1980, y cu keto bay ta tocando cu tur clase di musica. El a haya un lift cu Jan Poets pa hib’e su cas.
Coriendo riba Green Corridor dilanti Aeropuerto rumbo pariba, nan tabata coriendo trankil sin nada di velocidad exagera.
Sinembargo net 40 meter prome cu yega na e salida banda drechi cu ta e caminda principal cu hopi habitante ta usa pa bay casnan na Mahuma, Buenavista, y Cas Paloma, tanto Jan Poets y DJ Edson a tende un auto ta lastra brake largo.
Inespera e otro auto a bin dal den nan, y e momentum di impacto a pusha e Suzuki Carry Van baha di caminda, dal den e ‘isleta’ cu tin eynan net pa sali bay zuid, y pone cu e Van a bolter algun biaha y finaliza gekentel banda di un borchi di trafico cu a wordo ranca. E Van a keda 45 meter dilanti e cas Mahuma 52.
E auto cu a dal nan tras ta un Nissan March color blanco maneha pa un muher, cu despues di e impacto a bay finaliza den mondi banda pazuid di caminda.
Mesora yamadanan a drenta na Polis di e accident serio aki cu a socede como 225 meter pabao di e rotonde di Mahuma. Hendenan tabata indica cu e chauffeur ta basta grave y ta perdiendo hopi sanger. Diferente unidad di Polis, y tambe Ambulans a ser manda na e lugar.
Enberdad Jan Poets a keda pega den su vehiculo, keto bay sinta na e asiento di chauffeur, pero su man robez cu parti di su braza a ricibi heridanan serio, y esaki tabata sangra profusamente. Jan Poets tabata rogando pa Paramediconan yega rapido pa asina stabiliza e sangramento. Aki ta unda cu a pidi presencia di Vehiculo di Rescate di Cuerpo di Bombero pa yuda rek parti di e vehiculo algun centimeter y libera e chauffeur.
Agentenan cu a yega a cuminza papia tambe cu e chauffeur femenino di e Nissan March, y tabata ripara cu e muher su wowo ta basta cora, y su aliento ta hole sterki na alcohol interno. Fuera e tabata comporta su mes raro y tabata duna declaracionnan cu no ta cuadra. E muher di e Nissan March a sali ileso, pero toch a pidi pa bay cu Ambulans. Despues di un rato, Paramediconan a conclui cu e muher no ta herida, y a bahe bek na e lugar di accident. E ora Polisnan a dicidi pa puntra e muher si e ta coopera pa haci un test di supla. El a bay di acuerdo.
Ora cu el a supla riba e aparato di Alco Sensor IV, e resultado a sali malisimo pa e muher. Mesora el a wordo deteni pasobra el a viola Articulo 5 inciso 2 di Ley di Trafico. El a wordo deteni y transporta cu vehiculo special pa Warda di Polis, unda el a ser presenta dilanti Fiscal Auxiliar. A bin realiza cu e documentonan di e Nissan March no ta na ordo, y pa colmo su Aseguro no ta valido.
Despues di un rato nan a logra saca Jan Poets di e situacion precario, y cu urgencia a bay cune Servicio di Emergencia na Hospital. E tabatin hopi dolor e momento ey, y paramediconan a lora su man robez pa stop sangramento. E ta unico cu a wordo transporta pa Hospital, como cu DJ Edson a sali ileso.
Na Hospital el a wordo opera mesora door di Specialista Dr. Riley, pa asina haci coreccion na su man, y esaki ta un proceso cu lo bay tuma su tempo. Riba e potret aki saca Diadomingo, por mira momento cu Dr. Riley a pasa controla Jan Poets. Palabra di pronto recuperacion pa Jan Poets.
