Director di Tienda di Educacion Rhomyko Winklaar:
ORANJESTAD (AAN)—Den entrevista cu señor Rhomyko Winklaar, Director di Tienda di Educacion, tin hopi problema social den nos comunidad, yamadanan cu e instituto aki ricibi, no ta bin di un tema so, pero ta yamadanan tocante problemanan multifacetico.
Por ehemplo, e muchanan no solamente no ta comporta nan mes, pero kizas tin problemanan social den bario, na scol, y cu e parti di siñamento, y hopi biaha e mayor no sa con pa anda cu esaki.
Aki ta caminda unda Tienda di Educacion ta encurasha mayornan pa bin cerca nan, pa tene nan un rato cerca y tende di nan personalmente, kico ta nan deseonan, por ehemplo, y dje eynan traha hunto.
El a bisa cu kizas Tienda di Educacion no tin e solucion pero si por yuda, y si ta asina cu a yega na nan conocemento cu e problemanan social a aumenta, y naturalmente ta mira cu gastonan tambe ta keda subi.
Tienda di Educacion a tuma nota, por ehemplo, cu den e vacacion aki, tin hopi diferente camp ta tumando lugar, cual ta un bon iniciativa, ya cu nan ta specializa den musica, arte, deporte, etc., pero toch nan tin prijsnan hopi halto. Winklaar a menciona cu nan kier encurasha mayornan pa manda e yiu, kizas e di dos siman, of por ehemplo traha un schedule na cas cu e yiu, un dia bay lama, otro dia traha algo na cas, manera cushina hunto, traha un bolo, of haci un “movie night” y asina por keda agrega algo, na e deseonan di e mucha.
Winklaar ta compronde cu e ta dificil pasobra tur mayor tin cu traha. Pero tambe por wak si tin otro familiarnan, por ehemplo, cu por keda cu e muchanan. El a subraya cu no ta aconsehable laga e mucha keda haci nada, pasobra nan ta bay keda sin actividad structural, entre 5 pa seis siman, unda cu ora nan bay scol bek esey ta trece cune, cu nan tin cu bay bek den e rutina cu ta bay haci’e hopi mas dificil. “Pesey nos ta aconseha e mayornan pa traha un schedule y si boso no sa con boso por tuma contacto cu nos via 161. Nos por sinta hunto papi’e of nos por haci’e via what’s up unda nos por duna boso, consehonan, con pa yena schedule pa mucha, pa nan por keda activo”, señor Winklaar a indica.
