ORANJESTAD (AAN) – E Presidente di Comision Plan di Mayor, Michella Steenvoorde-Lacle, a duna di conoce na DIARIO,
cu e aña aki nan a haya subsidio di 150 mil Euro, for di Ministerio di Husticia di Hulanda, for di un pochi cu yama “Youth Criminaliteit Preventie” (Prevencion di Crimen Hubenil), di cual suma e Comision ta paga pa 13 persona, cu ta traha caba den e cadena, pa haya un “Familie Mediation Opleiding”, aunke, eigenlijk, nan tabata tin lugar pa 62 persona di sector di enseñanza, haya un opleiding di “Kies Coach” y di “Kies Mediator”; tambe a paga pa e website cu awo ta den desaroyo, y pa e expertonan bin y papia den e Congreso cu a tuma lugar na Aruba. “Na September proximo, papia tocante e problemanan compleho di divorcio y e ora ey nos ta bay paga pa atrobe 12 persona cu ta den e cadena caba, haya e opleiding cu yama ‘Ouderschap Plan & Parallel Solo Ouderschap’. Tambe e subsidio ta cubri Universidad di Utrecht y Universidad di Aruba, pa nan haci e meetingnan pa nos”, Michella Lacle a indica.
Loke Comision Plan di Mayor kier haci e ora ey ta pa bin cu un locket di Plan di Mayor, unda un mayor cu ta bay divorcia por yega pa haya informacion. “Na e mayornan nos ta ofrece maximo cinco mediacion, y pa muchanan nos ta brinda KIESS na scol, y loke nos haci ta, prome cu nan haya intervencion, wak con nan ta sinti y mescos despues di e intervencion. Anto despues di un par di aña cu e ley wordo introduci nos a midi atrobe, pa wak si tin un diferencia”, Michella Lacle, presidente di Plan di Mayor, a splica.
El a agrega cu e ora ey nan kier tuma 60 famia (cu a pasa den divorcio) y nan ta bay haci onderzoek si pa wak si loke e Comision ta haci ta bay resulta of no. E 60 famianan aki lo bin di Corte, Directie Voogdijraad, Departamento di Asunto Social, etc. Awo lo no yama nan bin na e locket pasobra esaki no a habri oficialmente ainda.
