Mensahe di IMF ta sostene un tendencia mundial creciente
*Aumento di prijs di petroleo ta sigui exigi cautela grandi
ORANJESTAD (AAN) — Uno di e informacionnan mas spera tabata e loke awor a subi mercado cu ta e informenan di IMF cu periodicamente ta indica na mundo kico e mester spera di economia mundial.
E expectativanan cu ta wordo pinta dor di IMF ta sumamente realistico den un mundo cu no a bandona e problemanan cu a hinca hende y mundo den un serie di problema.
Actividad mundial ta keda domina pa e intencionnan pa combati inflacion, e aumento di prijsnan cu mundo a conoce despues cu Guera di Ukraine a presenta su mes.
Aunke e situacion na Aruba ta duna tur motibo pa optimismo, mundialmente problemanan serio ta sigui presenta mas ainda den e situacion di guera di Ukraine, cu no ta parce di tin final.
Mientras den e proximo dianan DIARIO en extenso lo presenta e informacionnan di IMF riba loke por spera di economia mundial, uno di e puntonan cu mas merece atencion na e momentonan aki sigur ta e forma cu prijs di petroleo ta bolbe aumenta.
Ayera e prijsnan a sigui conoce aumento na momento cu mas y mas pais a entrega informacion cu inflacion a baha pero cu cantidad di prijs ainda no a baha mientras cu e seguridad internacional cu ta necesario pa stabilidad, no ta presente.
E informacionnan cu a drenta ayera ta mustra con mayoria di pais ainda mester lucha pa evita inflacion mientras ta lucha cu e cantidad di medidanan cu mester tuma den cuadro di e cambionan di clima.
Ta e cambio di clima ta uno di e problemanan mas grandi cu mundo ta enfrenta y ta exigi hende tuma mas medida ya cu e cambionan ta tuma lugar na un forma acelera.
Na hopi pais na mundo por nota ya e resultadonan cu situacionnan cu a cambia a base di clima a presenta y destruccionnan causa pa un naturalesa cu a bira violento.
E hecho cu prijs di petroleo ta sigui subi segun expertonan internacional ta motibo pa sigui tuma medidanan contra inflacion, cu manera ya bisa a baha pero no cu e forsa cu tabata necesario pa por papia di un stabilidad total.
Mas bien pues economianan mester wordo dirigi a base di un estado di alerta pa desaroyonan cu ta bini dilanti sigur den e informacionnan tocante economia mundial den e futuro mas cercano, cu ta bira un reto enorme pa e comunidad mundial.
