ORANJESTAD (AAN): Presidente di Organizacion di Pensionadonan Publico Arubano, esta Ireno ‘Ivo’ Valdes a splica cu nos pensionadonan ta preocupa.
Nan como organizacion tin tur esakinan poni hunto riba papel.
Segun Valdes, e preocupacionnan ta toca tereno di Cuido Medico, Pensiun, Seguridad pa nos Grandinan, actividad social, enseñanza, y reforma fiscal. Tur hende sa cu na aruba ultimo decada a conoce aumento substancial di hende riba edad di 60 aña. Esey ta trece cune cu Gobierno mester atende cu e asunto aki, pasobra e por sali for di man, tanto riba tereno di salubridad, pensiun, cas di cuido, y sin lubida e cuido na cas (‘mantelzorg’).
Riba dje, e cantidad di trahador local ta disminuyendo, y consecuenteente aruba ta depende di trahadornan di afo y mayoria vez ta hendenan cu ta gana salario minimo y nan tin di bay contribui na e fondo di SVb cu segun Organizacion OPPA, e fondo ey no ta mucho fuerte ultimo temponan. Aki tambe tin trabao pa haci pa cu e fondo.
OPPA ta bao di e impresion cu ta parce cu na Aruba, unavez bo bay cu pensiun ya caba abo ‘no ta conta mas’. Na opinion di Valdes, e percepcion ey mester cambia!
Pasobra den e pensionadonan bo tin yen di hende capacidad riba diferente tereno cu por sigui traha. E motibo pakico nan no ta sigui traha ta debi cu e propio Gobierno ta dal nan cu belasting, y esey no ta haci e tempo cu nan ta inverti y cu nan tin di bida ainda, mas atractivo pa traha.
Por ehemplo den Enseñanza falta hende, y sin menciona otro departamento cu a pasa den mesun situacion.
“Nos ta pidi e futuro gobernantenan pa no papia riba e grandinan, pero mas bien papia cu nan! No pensa pa e grandinan, djis puntra nan kico nan ta pensa. Anto asina traha un maneho con pa atende cu e grandinan, pero envolviendonan. Y unavez cu bo stipula un maneho, despues di un periodo tin di evalua e maneho, y haci esey cu e mesun hendenan! Nan tur ta dispuesto pa contribui na e tipo di planificacion aki, pasobra mey-mey di pensionadonan tin hende cualifica pa atende,” Ivo Valdes a bisa.
