Grupo Melodia cu un concierto espectacular den un sala completamente yen

ORANJSTAD (AAN): Diasabra anochi a tuma lugar e celebracion di Grupo Melodia den e sala di “New China Club” sold out, presentando den forma di un concierto unico.

  Un grupo di “fan-club” cu a para tras di e grupo aki y organiza e concierto, mester bisa cu den un forma hopi profecional y bon coordina a cuminsa exactamente 7’or caminda e publico por a disfruta di un repertorio hopi varia pa 2 ora y 40 minuut di musica continuo.

   Un bon zonido, efectonan di luz, un sala hopi bunita decora cu su escenario  cambiando e sala completo, tur presente por a sinta comodo disfruta henter anochi di e show, cu bon ambiente y hopi alegria cu na final a termina cu baliamento.

   Durante e actividad tambe a presencia e homenahe na Jufr. Maybelline Arends-Croes cu a ricibi un plakkaat di parti di Melodia como recuerdo di reconocemento pa su aporte durante tur e 15 aña di Grupo Melodia. Tambe el a ricibi su bouquette di flor for di un di e integrantenan cu mas aña den e grupo cu ta Kiziah Trimon y alavez un alumno di Maybelline.

   Melodia a presenta un repertorio pa por a identifica su mes manera nan semper a enfoca y presenta cancionnan crioyo, cancionnan classico y tambe international cu a sorprende tur hende riba e anochi aki.

Esaki a demostra cu nos mes tin hopi talento riba nos isla cu por haci cosnan bunita pa comunidad, y mescos talentonan pa organiza y hinca un tremendo show den otro y bon coordina mustrando cu nos tin gruponan cu por haci un diferencia den comunidad.

   Hopi comentario a mustra cu a pesar drentando e dushi temporada di fin di aña cu awor ta wordo mescla cu otro actividadnan, ta haya falta di tipo di actividadnan musical den e forma aki.

   Pueblo ta spera cu grupo Melodia por trece mas di e conciertonan aki den e temporada di fin di aña, presentando nan cancionnan bon solicita den pueblo.

   Grupo Melodia alavez kier a gradici su fanclub y tambe tur cu a yuda den haci esaki posibel, manera Dyon Party Center, DL entertainment, Amistad Restaurant, New China Club, Tat-Fat Hardware, Balashi y Tropical Bottling Company, Paradera party Center, Blossoms Restaurant, High Performance, tur programanan radial y otro medianan, y SQ ice.

   Naturalmente sin un publico no tin show, pesey kier a gradici tur cu a bin haci e anochi aki posibel y cu hopi ambiente.

   DIARIO a compronde cu Melodia tin pendiente pa pronto nan saca un otro tema musical y ta trahando riba un produccion tambe pa fin di aña.  Tambe dia 20 di November nan lo viaha pa algun presentacion na Corsou.

   DIARIO sigur kier a manda un palabra di pabien pa e grupo aki celebrando nan 15 aña, mescos un pabien cu e tremendo concierto y desea nan hopi exito pa futuro.