Mark Figaroa, director di APA:
*Na 2026 ta bin e megaship masha grandi: The Icon Class”
ORANJESTAD (AAN) – Mark Figaroa, director di Aruba Ports Authority (APA), den entrevista cu DIARIO a menciona cu e cruseronan ta keda bin Aruba den e temporada aki, regularmente.
El a menciona, por ehemplo, Oasis Class, Harmony of The Seas, Oasis of The Seas, entre otro. El bisa cu ta seis barco en total, cu no ta bin semanalmente pero regular si.
El a agrega cu pa 2026 ta bay tin Icon Class, cu ta un mega Cruiseship, esun di mas grandi cu tin na e momentonan aki y APA ta preparando pa esaki. Ya nan ta haciendo preparacion no den e canal, pero si den e parti di infrastructura unda tin cu crea e balanan pa mara e barco.
Señor Figaroa a menciona cu APA ta enfocando mas na mantene e High Season, cu ta liña di barconan mas chikito, manera entre otro Ritz Carlton, Four Seasons, Explora, Silver Seas, entre otro.
Otro aña, si tur cos bay bon, ta bin e barco Four Seasons unda Aruba ta un di su prome itinerario, cu ta di un liña di hotel “hyams” cu tambe a dicidi di bin den e mundo di crusero. Figaroa a duna di conoce cu ta bay tin un demanda mas grandi di crusero unda Aruba ta un di e destinonan preferi.
“Nos ta trahando duro tambe pa e servicio cu bo tin cu duna bek, pasobra nan tin un extra atencion tambe, un servicio na un nivel mas halto cu nan average di bishitante di crusero. Pues, nos mester traha conhuntamente cu ATA pa wak con pa mehora esaki no unicamente en APA mes, pero tambe den full e parti servicial di bo destinacion”, señor Mark Figaroa, director di APA, a señala.
