Mark Figaroa, director APA:
ORANJESTAD (AAN)— Mark Figaroa, director di Aruba Port Authority (APA), a indica den entrevista cu DIARIO, cu APA no tin intencion di traha mas pier, mirando cu tin mas demanda pa bishita di barconan na Aruba.
Loke si ta e caso, ta mantene loke nos tin. “E aña aki ta aña di inversion, y mantencionnan grandi. Nos ta haciendo basta inversion den mantencion, y por mira cu nan ta andando. Nos ta purba di haci tur mantencion y inversion den e temporada abao cu e cantidad di barconan ta menos”, Figaroa a comenta.
APA ta inverti hopi den e parti maritimo y nan ta tene cuenta cu organizacion pasobra ora di haci mantencion e inversionnan ta basta grandi. Figaroa ta premira un liña di crecemento di 3% mas of menos. “Loke nos ta purba di mantene ta e crecemento controla y structura. Nos ta ripara cu ora tin dos or tres barco grandi bo ta pone presion riba e infrastructura y esey ta algo cu APA ta purba di controla”, señor Mark Figaroa a señala.
