ORANJESTAD (AAN): Den cuadro di celebracion di su 75 aña, Parokia di Santa Filomena di Paradera ta organisa un evento bailabel special titula “Anochi Bailabel”,
cu ta tuma lugar diasabra, 24 di mei 2025 for di 8:00 anochi te 2:00 di madruga na Renaissance Convention Center.
E evento aki ta un recaudacion di fondo pa contribui na e renobacion di Misa di Parokia, un iniciativa importante pa mantene e espacio sagrado den bon estado pa e comunidad.
E nochi ta priminti pa tin un ambiente musical espectacular cu presentacion di:
Nfusion, Robert Jeand'or y su Solo Banda. Metropolis Disco
Entrada ta AWG 100,--, y lo tin doorprices y taxidancers. Tambe lo tin bar y cushina pa garantisa cu tur hende pasa un anochi agradabel y divertido.
Ta invita tur miembro di comunidad pa bin apoya e causa noble aki y pasa un anochi inolvidabel.
