Tin hendenan cometiendo sabotahe riba sistema di riolering banda di Hotel

Compania AWSS a entrega keho

• A haya paña cu baranca y hero y hasta biga den riolering
• Pesey atrobe awa sushi a sali y plama rond 

ORANJESTAD (AAN): Den pasado na diferente ocasion, DIARIO a publica con e.o. na Monserat den distrito di Noord a bin haya full un clechi di cama benta den riolering cu a bay pega na un pomp, y a ‘plug’ e tuberianan aki y trece molester di awa sushi a sali for di tapaderanan.

  Tambe DIARIO a publica di situacion den area di Irausquin Boulevard dilanti Highrise Hotelnan, unda tin hende sin escrupulo ta sigui basha “azeta di cushina” den riolering y esaki ta causa cu e sistema ta pega.

   A bay investiga: Pero awor a bin haya sa, cu ta parce di algun hende cu ta dedica nan mes pa comete sabotahe riba e sistema aki.  Esey ta loke e compania ‘Aruba Wastewater Sustainable Solutions NV’ a divulga e siman aki.

   E compania AWSS a splica, cu debi cu awa di riool a sali for di sistema di riolering como 1 siman y mey pasa banda di hotelnan grandi, AWSS a manda un team pa haci investigacion di kico por tabata e causa.

   E personal di AWSS a haci inspecion na diferente lugar y pa nan sorpresa a bin detecta cu e tapa di e sistema di riolering tabata habri y a benta diferente materialnan den e sistema, pues a descubri paña, baranca, hero y hasta un biga.

  Esaki a haci cu e fluho di awa di riool a worde obstaculisa cu consecuencia cu el a bin ariba y a causa molester. Tambe a bin descubri cu tapanan di pos cu normalmente ta cera a worde habri banda di algun hotel. Tur esaki ta mustra cu lo por ta trata di un of mas persona cu mal intencion a planea y actua den coordinacion pa causa molester y haci daño na nos turismo y imagen di Aruba.

   Entrega keho oficial: Mientrastanto gerencia di AWSS a tuma e decision pa entrega keho na autoridadnan pa asina un investigacion penal por cuminsa pa haya sa kendenan ta tras di e actonan aki cu ta mustra di ta sabotahe.

   E asunto aki ta algo serio y gerencia di AWSS ta dunando esaki tur e atencion necesario.

   Cualkier persona cu por sa, of a mira ta kendenan ta habri e posnan aki y benta obhetonan aden, ta ser pidi pa contact Tipline di Polis tambe na 111-41 pa yuda autoridad gara esnan cu ta cometiendo gran daño na turismo y na e sistema completo.