Den su reflexion riba Dia di Labor na Aruba:
*Un ley hopi importante pa e trahado pa dunador di trabao cumpli cu seguridad y salud na pia di trabao
ORANJESTAD (AAN) Señora Magaly Brito, Secretaria General di Sindicato di Empleadonan Publico y Priva (SEPPA), den entrevista cu DIARIO a bisa cu si bay reflexiona kico e Dia di Labor ta nifica pa e trahado, y sigur pa e organizacionnan sindical, mester conmemora e hecho cu 139 aña pasa tabata tin luchanan fuerte pa diferente condicion cu, eigenlijk, awendia nos ta disfruta di dje.
“E prome tabata e ocho ora di trabao, pero cu tempo tabata tin hopi otro lucha cu awendia e trahado tin y cu ta parce of ta kere cu tur esnan a bira automatico.
“Lamentablemente, 1 di Mei a pasa pa ta un dia liber. Antes tabata celebra Dia di La Reina dia 30 di April, y esey tabata haci cu tabata tin un fin di siman largo, y e tabata haci cu hopi otro grupo cu nan interes ta organiza dianan di actividad aheno, na e lucha sindical”, Magaly Brito a expresa.
“Si nos wak aworaki, unda nos ta para, t’asina cu nos, como organizacion sindical nos ta pidi hopi atencion na e administracion publico, pa e aparato, en general pero principalmente pa e Departamento di Labor, mirando cu hunto cu ne tin tambe riba mesa, e famoso ‘Landspakket’ cu su tema di flexibilizacion di nos leynan laboral”, Brito a indica, y el a bisa cu esaki nan lo a presente na e dos formadornan y na e gobierno cu a sinta.
“Si nos wak kico e flexibilizacion aki cu a wordo pidi y kico ta wordo pusha grandemente, pa dunadornan di trabao ta, e ta haci nos reflexiona si e lucha di e ultimo añanan, cu a duna balor y contenido na e Dia di Labor aki, esta 1 di Mei, na unda cu den otro paisnan por wak manifestacionnan grandi pa loke ainda mester wordo logra y pa mantene, hasta, loke a wordo logra, cu ta entre otro, respet pa nan derechonan laboral, respet pa e ocho oranan di trabao, pagonan husto, pago di salario na tempo, pero tambe derecho na servicionan publico, derecho na salud y bienestar na pia di trabao”, Magaly Brito a trece dilanti.
El a agrega cu, por cierto dia 28 di April a wordo celebra e Dia Mundial di seguridad y salud na pia di trabao, pa mas of menos seis aña caba e tema di Arbowet ta pega. Y esey ta hopi importante pa e trahado. “Una bez cu e ley aki ta in place, e dunadornan di trabao por cumpli pa e seguridad y salud, y pa seguridad na pia di trabao, y na unda ta rekeri tambe pa trahadornan tin un voz den tur locual cu ta necesario pa tin un ambiente liber di tur peliger, y cu ta pone enfasis principalmente, riba convenionan internacional na unda ta poni e tema di prevencion di accidentenan laboral”, Secretaria General di SEPPA a señala.
