Señor Edwin Roos, Presidente Wit Gele Kruis:
ORANJESTAD (AAN)—Señor Edwin Roos, Presidente di Wit Gele Kruis, den entrevista cu DIARIO a elabora tocante e problemanan social cu hopi di nos grandinan ta confronta, entre otro financieramente.
E aspecto financiero a wordo causa, Roos a splica, door cu hopi di nos grandinan a bin biba na Aruba na un edad mas halto, pa locual nan no ta ricibi 100 AOV, y hopi di nan no tin un pensioen adicional. Esaki ta un asunto hopi serio y mester wak con pa atende cu ne.
No tur ora nan tin famia cu nan por conta riba nan, vooral financieramente, mientras cu costo di bida ta mesun caro pa tur hende, y esaki ta rekeri un otro atencion, cu no ta directamente di cuido.
“Naturalmente, tin biaha nos hendenan ta wordo confronta cu situacionnan asina tristo, cu bo no por imagina bo mes, cu esey ta pasa na Aruba. Nos tur tin un cierto orguyo y no ta bay acudi di biaha pa cierto ayudo. Hopi biaha bo no sa unda ta haya ayudo, pero hopi biaha tambe, e berguenza ta hunga un rol, cu e situacion ta keda dura mas cu ta necesario”, señor Roos a señala.
Roos a indica cu WGK ta den diferente comision cu diferente instancia cu ta traha hunto cu ne, y e ciudadanonan riba caya tin nan wowo habri semper y nan ta wak y señala tambe cosnan cu nan ta mira.
“Sociale Zaken tambe ta un partner hopi grandi y importante pa WGK, den e area aki. Nos ta topa tambe cu hende cu fuera di nan edad, of cierto malesa, cu ta funciona bon pero tin otro gruponan di edad cu tambe nos ta wordo confronta cu ne. Nan ta hoben pero tambe adultonan mas jong cu tambe ta cay den cierto dificultadnan. Tur esaki nos a señala, y tambe acudi cerca partnernan di cual DAS ta un pero tambe Voogdijraad, nos tin hopi contacto cu Ministerio Publico tambe, y nos ta participa tambe den e parti di Veiligheids cu ta bin sinta hunto, y nos ta trata tur sorto di caso”, el a menciona.
Señor Edwin Roos a duna di conoce tambe, cu aworaki WGK ta ocupa pa pone tur nan cifranan hunto, pasobra nan trahadornan ta haci nan anotacionnan den schrifnan tradicional.
“Aworaki, door cu ta temporada di vakantie tin studiante cu vakantie job cu ta pone tur cifra pa nos, pa nos wak. Esey ta e parti di 'Alfahulp' cu hende ta haya ayudo na cas, y eynan ta e casonan cu no tin suficiente medio financiero. Un cos cu si tey caba ta cu e subsidio cu nos ta ricibi di gobierno no ta cubri tur nos gastonan, dus nos ta cobra cierto tarifanan cu ta hopi social, pero toch nos tin cu cobra pa cierto cosnan”, Presidente di WGK a splica.
El a comenta cu e casonan cu nan ta mira cu ta rekeri di e cuido ey, WGK ta acudi na DAS, anto e personanan ey, individual caba, ta bin na remake pa haya loke nan mester paga WGK.
“Kiermen, Sociale Zaken ta paga nos den nomber di nan. Esaki ta un druppel chikito riba un panchi hopi cayente”.
