Desaroyo inespera riba Diasabra
KRALENDIJK: Un shock ta loke pueblo di Bonaire a ricibi riba Diasabra, y esaki a bira un berdadero yamada di habri wowo pa hopi, cu ta mustra cu tin conflicto den gobierno di e isla di Flamingo.
Diripiente riba Diasabra, diputadonan femenino Nina den Heyer y Anjelica Cicilia a entrega retiro. Nan a presenta personalmente cerca Ingrid Sealy, kende ta fungi como Gezaghebber interino di Bonaire, como president di Conseho Insular di e isla. Den e carta, tanto Den Heyer y Cicilia a indica cu nan ta stop cu nan trabaonan inmediatamente.
Gezaghebber interino Sealy a tuma nota di e decision di e diputadonan, y a informa e miembronan di Conseho Insular y demas miembronan di Colegio Ehecutivo di e retiro.
Fuentenan na Bonaire ta indica cu tin hopi asunto cu a socede, pues tras di e retiro tin hopi asunto cu a montona pa asina nan dicidi na tuma retiro.
A haya sa cu coalicion actual na Bonaire a insisti pa substitui por lo menos un di e Vak-Diputadonan aki, debi cu nan tin e sentimento cu e dos Diputadonan no ta acepta facilmente e peticionnan di coalicion, cu lo ta di agrado na partidonan en cuestion, of ta motiva pa consideracionnan politico.
Loke por ta hunga un rol tambe ta cu ambos Diputado femenino (cu e momento aki riba e isla ta gozando di hopi sosten pa nan forma transparente y al caso di goberna), lo no ta sinti di tin mesun sosten mas di colega diputado Clark Abraham pa por cumpli cu deseonan politico di e socionan di coalicion. Corda cu Abraham aki, ademas di diputado, ta tambe e lider politico di e partido mas grandi di coalicion, esta Partido PDB.
E retiro di e dos Diputadonan aki a shock comunidad pasobra nan ta mirando cu e dos damanan aki a traha fenomenal den Gobierno. Pero coalicion mes no a ni ril mes, pasobra nan no a ni reacciona riba retiro di e dos diputadonan aki, pues nan no a ni keda sorprendi cu e retiro inespera aki.
Esey nifica cu aunke poblacion ta pensando cu lo tin conflicto, toch esnan den coalicion di Bonaire no a ni bay den panico. Chens ta grandi cu ya caba nan tin Diputado nobo para den rij, cla pa reemplaza esakinan.
Pueblo di Bonaire si a indica cu nan a keda desapunta den retiro di e dos damanan fuerte aki.
