Señora Flora Brigida Petronilia:
ORANJESTAD (AAN)—Den un entrevista cu DIARIO, señora Flora Brigida Petronilia, Policy Advisor, Occupational Health an Safety Ordinance, pa Gobierno di Aruba, a splica cu recientemente, relaciona cu e Dia di Seguridad y Salud Laboral y Dia di Labor, a tuma lugar un Congreso dos siman pasa, den cual staf di gobierno a participa, y na unda e mes a wordo invita pa duna informacion tocante e desaroyonan di “Arbowet”, cu ta un ley cu ainda no a drenta na vigor.
El a señala cu, manera ta conoci, nan a finaliza cu e formacion, na April 2019, prome cu nan a yega na un tripartite social-laboral.
Despues nan a finaliza na unda nan a crea un organizacion den cual e dialogo ta wordo concretiza den un parti di un organograma, cu su bestuur, consehero y delegadonan. Kiermen, gobierno, sector priva y sector publico. E ora ey e ta envolve gobieno, gremio sindical y gremio comercial.
Petronilia a menciona cu ora e pandemia a yega, mayoria di e proyectonan a keda “on hold” pasobra tabata tin otro prioridadnan, pero esey no a kita cu nan a traha riba e parti di salud y seguridad, locual tabata e taks force, unda e mes a forma parti di dje, hunto cu señor Ferdinand Ponson.
Di eynan a traha un par di luna y despues a sigui cu otro trabaonan cu a wordo rekeri na e momentonan ey. Señora Petronilia a splica cu Minister Glenbert Croes a bolbe reanuda y a acerca e taks force y pidi pa e dialogo tripartite social-laboral bin bek, y tambe e ley di Arbowet.
El a agrega cu hustamente e aña aki, e Organizacion Internacional di Trahador (ILO) tambe a forma parti di e aspecto di seguridad na pia di trabao, y nan a bin cu e tema di e aña aki, pa un dia den 365 ta keda ancra, na unda cu nan ta bisa cu mester bin cu un structura, unda tur hende conhuntamente ta bay traha riba un tema of un ley, unda ta wordo bisa cu e parti di seguridad y salud na pia di trabao, mester wordo fortifica pero tambe nan a bisa cu mester bin cu un sistema y esey ta e Dialogo Nacional.
“Mi ta hopi contento cu nos tin tur e dos temanan ey y e dos parti cu nos por bisa cu e tools cu nos por traha riba dje, awo nos por reanuda bek. E dialogo tey, manera ta conoci, anto tur e temanan mescos cu nos a haci cu e Ley di Arbo ta wordo treci dilanti eynan”, señora Petronilia a señala.
El a sigui bisa cu lo mas importante ta cu ILO ta haci enfasis ta, cu mester tin e structura di un Dialogo Tripartite, na unda gobierno, comercio y sindicato mester forma parti di dje.
“ Di con? Pasobra e pandemia aki a siña, no solamente Aruba sino tur pais na mundo, cu si no tin un structura con pa alinea y fortifica e leynan laboral pa e trahadornan ta sigur y cu salud na pia di trabao, pero cu prevencion; kiermen, cu nan sa caba cual ta e parti di prevencion cu tin cu uza, pa evita un contaminacion”, Petronilia a agrega.
Tambe e aña aki nan a enfatiza hopi riba e personanan cu a fayece door di “x” enfermedad cu nan a adkiri na pia di trabao y tambe hopi persona cu a bay asisti Hospital, casnan y centronan, na momento di Covid-19 sin cu nan a proteha nan mes, door cu no tabata sa e situacion con e virus aki tabata hinca den otro.
