Un problema cu tin FTA preocupa, segun Hose Figaroa:
ORANJESTAD (AAN) – Hose Figaroa, Presidente di e Federacion di Trahadornan di Aruba “FTA”, señala den entrevista cu DIARIO, cu tin un problema cu e pension general, aki na Aruba, riba cual te dia di awe no tin control riba dje.
Figaroa a bisa cu tin mas cu diez aña caba cu e Ley di Pensioen aki a wordo pasa pa henter Parlamento, los di e pension di AOV, pero si pa reforza esaki.
Cu ley aki, na Aruba, mester contribui na e fondo di pensioen pa e trahador por tin, na momento cu e yega edad di pensioen, un entrada adicional, esta un pensioen priva, un pensioen di trabao.
“For di momento cu e ley a wordo introduci, e ley ta bisa cu mester a nombra un organo di gobierno, cu bay controla cu dunadornan di trabao ta cumpli cu e ley aki. Tin mas di diez aña cu e ley ta existi, y esey no a wordo haci nunca”, Figaroa a señala.
El reitera cu tin un ley cu ta bisa cu dunador di trabao y trahado ta obliga na contribui un fondo di pensioen, pero no tin e control aki locual ta haci cu pa añanan, na diferente momento, hasta casonan den Corte a wordo entama, unda dunadornan di trabao ta retene placa di pensioen for di e salario e trahado y e no ta deposita esaki na e fondo di pensioen. Na diferente compania esaki ta sosode. E trahado mester haya un declaracion anual di locual e tin acumula na pensioen general.
“E trahado ta mira cu esaki ta wordo kita for di su pay slip, pero na momento cu e yega su edad di pensioen cu ta e momento cu ta suppose di haya su declaracion, di kico ta su pensioen, nunca e ta ricibie. Pa ley e trahador mester hay’e pero e fondo di pensioen aki no ta cerca su doño di trabao, e ta un fondo priva, y tin diferente empresa aki na Aruba cu ta hacie, y supuestamente nan ta retene e suma, pero no ta pas’e na e fondonan aki”, Figaroa a reitera.
El a agrega cu como trahado, ta importante pa paga tino riba esaki, y na momento cu e ta wak cu nota haya e declaracion un biaha pa aña, haci pregunta na e doño di trabao y puntr’e con bin cu e no ta hayando su statement eynan, for di su asegurador, unda cu e ta mustra kico su pensioen ta. “Si esey no ta sosode e chens ta grandi cu e dunador di trabao no ta bezig ta manda e placa na e fondo, pero e ta retene cerca dje, y ta placa di e trahado e ta, pasobra entre otro, tin un porcentahe cu abo ta pag'e. E dunador di trabao ta retene for di bo salario pero no ta pas’e pa e asegurador, locual ta nifica e ora ey cu bo no tin un pensioen”, Hose Figaroa a reitera.
