Comerciante Francis Saladin:
- Despues di Covid-19 no sa kico a pasa pero demanda a aumenta
- Y na mas demanda mas halto e costo di bida!
ORANJESTAD (AAN) Constantemente, e comerciantenan cu ta bende alimentonan, ta ricibi yamada di nan suppliers, avisando nan cu prijs di productonan a subi, of ta bay subi. Nan ta haya sa fecha y cuanto e costo di e productonan ta bay bira.
Asina Francis Saladin a duna di conoce den un entrevista cu DIARIO. El a señala cu ta productonan average cu ta subi di entre 9% pa 12%. Nan ta productonan di nos mundo di cuminda.
“Despues di COVID-19 mi no sa kico a pasa na mundo, pero ta manera un cos cu mundo ta consumi mas cu antes, anto esey ta haci cu e presion ta hopi grandi, riba esnan cu ta produci sea agricultura, fruta, verdura, etc. Of sea maneha tur e malesanan cu ta andando den galiña of carn’i porco, y hasta den fruta cu berdura. Tur e diferente impactonan aki ta haci cu prijs ta keda subi, y e ta algo cu nos ta premira y nos ta wak’e tambe de shipping, eynan tambe nos ta wak cu prijsnan cada bez ta subi gewoon”, Saladin a señala.
El a agrega cu aunke prijs di gasolin no a subi per se, e ta kere cu ta 80 florin pa bari actualmente, toch “some how” e gastonan operativo ta aumenta.
Saladin a referi na Merca, unda e trahadornan di waf a welga pa exigi un salario mas halto, unda nan no kier pa e compania implementa mas tecnologia, nan kier limita esaki, pasobra nan sa cu e ta afecta nan trabao, hasta nan tin chens di perde nan trabao. “Pero, esey ta e cambio na mundo cu bo ta wak. Claro, e ta mescos cu bo ta mira na Aruba tambe, tur hende kier gana mas y costo di bida ta subi, pero bo gana mas esey ta haci cu e empresanan tin mas gasto, y e unico manera cu nan por cubri e gasto, ta subiendo prijs!” Saladin a comenta.
El a menciona cu hopi hende na Aruba ta bisa cu e comerciante ta subi prijs, pero no ta nan ta subi prijs. Mester corda cu na Aruba, tur cos ta wordo importa, pues basicamente e comerciantenan ta cumpra e producto y e bendedor ta pone prijs pa nan. Tambe e producto ta wordo transporta y e transporte tambe su prijs a subi, tin e belasting cumulativo na Aruba di 7% (cu antes tabata 3%) y awo no sa na unda e ta bay. “Pero locual nos ta premira ta cu basicamente, ‘across the board’, no ta cu solamente un parti ta bay subi, nos ta wak cu den tur categoria, prijsnan ta subi”, Francis Saladin a reitera.
El a subraya cu aworaki cu Aruba ta bayendo den temporada halto, epoca di fiesta, esey ta haci cu e demanda ta hopi mas halto ainda, y aworaki comerciantenan ta premira un subida di prijs en general door di e dianan di fiesta.”Y e impacto di COVID-19 tin di haber cu tur hende kier biba mas, disfruta mas, haci mas, y ora cu tin hopi demanda prijsnan ta aumenta”, Saladin a splica.
