Pa loke ta pensioen general:
ORANJESTAD (AAN) – Presidente di Sindicato F.T.A, Hose Figaroa, a splica cu un persona cu a aporta na e fondo di pensioen general y yega su edad pa baha cu pensioen, y e ora ey ta ripara cu su doño di trabao no a pasa su contribucion na e asegurador, tin caminda pa cana.
E trahado por lanta caso contra esun responsable pasobra el a ricibi daño. “Bo tin un caso eynan pasobra e placa ey ta wordo reteni for di bo, pues, pa culpa di bo dunador di trabao aworaki e ta sin entrada, sin pensioen, pasobra abo tabata contribui a base di ley, y e tambe ta suppose di a contribui cu un parti pas’e pa e fondo.
Na momento cu e no ta haci esey y bo a yega na edad di pensioen bo entrada ta wordo afecta, door di algo cu bo dunador di trabao a keda sin haci. Pues e ta responsable di paga bo daño y perhuicio, door di e daño cu bo ta ricibiendo, door cu bo tin derecho riba dje”, Hose Figaroa a reitera.
Figaroa a señala un biaha mas, cu e ta papiando di un ley cu a wordo pasa mas cu 10 aña pasa, cual diferente Parlamento a caba di implementa e ley manera mester ta.
E ta haya cu ta hopi importante cu e siguiente gobierno tene cuenta cu esaki, pasobra no ta e idea cu e trahado bay busca pa wak si di berdad e dunador di trabao ta bezig ta deposita su pensioen, si of no. E trahado no tin e conocimento necesario pa check esey. “E ta un tarea a base di ley, e ta un tarea di gobierno, y gobierno mester nombra un instancia cu ta hiba e control eynan, pa kita e peso for di e trahado”, Hose Figaroa a enfatiza.
