Tin diferente opcion pa deshaci di taira

Minister Ursell Arends: *E ciudadano ta para pa haci su escogencia pa Aruba 

ORANJESTAD (AAN): Entrante dialuna 22 di augustus, 2022, Aruba lo tuma un paso grandi pa cera Parkietenbos y ta duna inicio na un maneho responsabel y sostenibel di desperdicio. Serlimar lo prohibi e entrega di taira na Dump Parkietenbos. Den e manera aki por tuma e prome paso pa evita candela cu ta kima pa decadas caba na Parkietenbos. Taira por ser entrega na na Ecotech Freezone NV y pronto tambe na Carentra VBA. 

            Ministerio di Naturalesa a tuma nota di algun tireshops cu a tuma e decision di ofrece e cliente un servicio incompleto na momento di cambia taira (nan comunicado adhunto). E tireshops aki a pidi pa delibera cu Gobierno  pero no a propone un plan of solucion realistico. Desde februari tur instancia na Aruba por a propone un solucion pa e tema di tires y ta solamente dos compania a presenta plan concreto.  Esaki no ta momento pa bolbe crea tardansa den e clausura di e dump Parkietenbos, cual lo crea espacio pa candela sigui surgi.

           Na e momento aki ta keda na e ciudadano cu ta doño di vehiculonan pa haci su escohencia na fabor di nos Pais.

Den esaki e ciudadano tin diferente opcion pa deshaci di nan taira:

1. E consumidor por opta pa un tire shop cu ta brinda servicio incompleto, bay cu su taira, y tir’e den mondi. Si scohe pa pone moralidad un banda y daña nos medio ambiente, ta core e riesgo di un multa te cu 10,000 Florin of 6 luna den prison ya cu esaki ta un acto castigabel (“strafrechtelijk”).
2. E consumidor por opta pa un servicio incompleto, bay cu su taira, y entrega esaki personalmente cerca Ecotech Freezone NV unda e lo paga Afl. 0.19 cent pa kilo. E gran mayoria di chauffeur na Aruba ta haci uso di un taira di mas o menos 12 kilo, esta Afl.2,28 pa segura cu su taira wordo procesa den un manera responsabel.
3. E consumidor tambe por opta pa haci uzo di e servicio di e negoshinan cu ta recoge desperdicio y hiba esaki na pa ser procesa manera menciona ariba.
4. E consumidor por opta pa un servicio completo cerca cualkier otro tireshops na Aruba, incluyendo e transporte di taira na e Ecotech Freezone NV of Carentra VBA pa procesamento responsabel. Asina nos tur por contribui na paga e candela na dump y tene Aruba limpi.

            Minister Arends ta gradici tur compania y ciudadano cu ta forma parti di e solucion pa por cera Dump Parkietenbos, y pa segura cu tairanan por wordo procesa den un forma responsabel pa por paga e candela na Parkietenbos y scapa nos medio ambiente.