Den menasa di recesion nobo, tempo ta entrega un bista nobo di BBO
- Pueblo agita no a realisa cu Mike a admiti cu no por kita BBO
- Reforma fiscal di Nelson Oduber y e anhelo pa poder di Mike Eman
ORANJESTAD(AAN)- Cu cambio di siglo lo a trece drama y desaster, tabata loke mundo tabata teme. Prome cu 2000, hende tabata biba den tension tremendo pa planeta cu por bini abou te fin di mundo.
Cu mundo tabata enfrente algo mucho mas serio, ta loke a bira evidente ora recesion a anuncia su mes y a afecta e situacion financiero y economico di mundo.
Den e tempo aki, e anhelo di Reino pa e paisnan Hulandes den region di Caribe cuminsa para riba nan propio pia, a haya mas forsa.
Den e prome decada di Siglo 20, reforma fiscal a bira e palabra cu a haci su entrada pa trece cambio den e forma cu tabata paga belasting y sigura un miho base financiero pa e paisnan.
Impuesto indirecto a bira un hecho den BBO durante gobernacion di Gobierno Nelson Oduber, cu nos mes a critica hopi pa su decision.
Nos a prefera Sales Tax cu tabata un solo bez.
E discusionnan tabata cayente y sigur atractivo pa Mike Eman, cu for di momento cu su ruman Henny Eman a bira Prome Ministro di Aruba, tabata e figura popular di gobierno y a bira parti directo di gobernacion di Aruba como asistente di su ruman.
Introduccion di BBO, cu tabata un reforma fiscal total cu mayoria di hende no por a comprende, a bira e trampolin cu Mike Eman tabata tin mester pa e lansa su mes como candidato di su partido.
Awe, cu Mike Eman obviamente kier ripiti su logro di voto despues cu Evelyn Wever-Croes a logra mantene cabez di Aruba riba awa, mester regresa na e introduccion di BBO.
Sigur mester busca un contesta pa e pregunta, kico lo a pasa si no a baha BBO na 2010.
Rapportnan cu e tempo no por a haya atencion, awe ta disponibel pa mustra, kico realmente e reformacion fiscal tabata encera y pakico Mike Eman no por a realisa su compromiso di campaña pa deshaci di BBO.
Cu Mike ta un politico cu ta maestro den e arte di manipula Pueblo, ta mas cu conoci pero sigur ta bini dilanti den e hecho cu e ta sconde tras di e gran realidad, cu BBO tabata tin resultado sumamente serio pa Aruba, loke a haci cu e no por a cumpli cu su promesa di campaña pa deshaci di BBO.
Na 2014 ya Gobierno di Mike Eman mes a aplica generacion di placa pa medio di Un porciento BBO.
Ora mira atras, for di 2010 Aruba a wordo manca cu pago di debe, di cual e prome tabata pa yena e bashi financiero cu reduccion di BBO a trece.
Kico lo a pasa si no a deshaci di BBO na 2010 y evita cu awe Aruba ta den un desastre financiero cu ta exigi of BTW of aumento di BBO?
Por culpa pandemia y por culpa guera na Ukraine pa loke ta pasa actualmente na Aruba. E loke ta pasa ta mescos of hasta menos cu loke ta pasa na otro pais.
Aruba su problema ta, cu e tabata tin un politico cu yama Mike Eman, cu a mira solamente e puesto di Prome Ministro cu a entrega na su persona e oportunidad pa briya rond mundo.
Mike Eman a uza BBO pa e haya un poder cu a resulta destructivo pa Aruba pero a manipula e pais di tal forma, cu Aruba no a realisa cu e mes no por a deshaci completamente di BBO cu a reemplasa otro entradanan di Gobierno tambe.
Kico lo a pasa si no a deshaci di BBO? Hulanda lo a introduci emedidanan cu el a introduci actualmente?
Cuanto placa mas e Arubiano mester paga awe pa su pais por sobrevivi?
Finalmente un pregunta ta bini dilanti. Kende tempo ta duna razon?
Lo ta bon pa expertonan duna un splicacion di loke realmente a pasa cu Aruba cu awe mester bolbe papia di medida mientras un recesion mundial ta bati atrobe na porta y atrobe agitacion politico di Mike Eman kier deshaci di e realidad y bienestar di e pais!
