Dr. Joyce Pereira:
ORANJESTAD (AAN): Dr. Joyce Pereira, di Fundacion Lanta Papiamento, recientemente a duna di conoce riba un pregunta cu DIARIO a haci'e tocante e posibilidad pa duna cursonan na comunidad en general pa asina actualisa cu Papiamento den su loke ta e gramatica oficial.
El a duna di conoce cu tin cursonan. Tin diferente hende y fundacion cu ta duna curso di Papiamento. Pa esaki mester keda busca informacion riba esaki ya cu te hasta tin cursonan gratuito cu algun fundacion ta brinda manera esun di Fundacion Venearuba.
Pereira a indica cu tambe aworaki tin un grupo di Fundacion Corector di Papiamento cu ta bay organisa un curso basta extenso pa Papiamento cu ta dura un aña cu ta consisti di 4 modulo. El a bisa cu pronto pueblo ta bay haya informacion tocante esey pasobra Fundacion Lanta Papiamento ta preparando hunto cu nan e curso ey.
