Investigacion grandi andando na Venezuela
CARACAS: Den fin di siman, Fiscal General di Venezuela a duna e ultimo detayenan di e investigacion grandi den e caso bergonzoso di corupcion den PDVSA. Ya caba un total di 42 persona, e.o. funcionarionan y empresarionan ta implica den actonan di corupcion den empresanan di estado.
Segun Fiscal General Tarek William Saab, te cu awor Ministerio Publico cu yudanza di departamentonan auxiliar, a detene 42 persona vincula na diferente acto di corupcion cu tabatin como meta pa comete desfalco riba economia nacional, y dañando comunidad en general.
Tabata Diabierna 17 di Maart cu e prome detencionnan a cuminza cay, y a wordo ehecuta door di Policia Nacional Anti-Corupcion.
Entre esnan deteni tin Pedro Maldonado (presidente di compania estatal Corporacion Venezolana de Guayana, CVG), esnan na cabez di Siderúrgica del Orinoco (Sidor), y e ex-Diputado Hugbel Roa, Jackeline Perico, José Lima, y Olvani Gaspari.
Tambe a detene Bernardo Arosio (di Prodata Energy C.A.), y debi na esey un compania grandi na Colombia a cancela tur intento di adkiri gas venezolano pa usa na e pais bisiña.
Algo cu a hala atencion mundial ta na momento cu President Nicolas Maduro a anuncia dos siman pasa, cu e Ministro di Petroleo, esta Tareck El Aissami a entrega su retiro relaciona cu e casonan di corupcion aki.
A bin descubri, cu mayoria di esnan deteni tabata haci ‘operacion petrolero paralelo’ cu PDVSA via di asignacion na Sunacrip y na mesun momento nan mes tabata yena y manda barconan tankero afo yen di crudo, sin cu nan tabata cumpli cu ningun reglamento.
