KRALENDIJK: Den fin di siman, informacion a drenta for di Nationaal Forensisch Instituut na Hulanda,
y Recherche na Bonaire a haya sa oficialmente cu e cabez di carpachi cu a wordo haya algun tempo pasa, a wordo identifica como restonan di e persona perdi, Ludwig Cicilia, kende ta mihor conoci como Spèkè.
E investigacion forensico a comproba esey. Awor Departamento di Recherche ta sigui atende algun asunto ainda cu tin di haber cu e caso aki, y pa awor no a duna mas informacion.
Tabata for di 11 di Januari 2023 anochi cu Spèkè a desaparece for di su residencia na Rincon. Hasta avion Dash-8 di Wardacosta cu aparato FLIR abordo a wordo usa pa trata na localize, pero no a logra. A hasta yama monton di boluntario pa hunto cana haci un buskeda den mondi.
Pero dia 16 di Februari, a descubri e cabez di carpachi, y a dicidi mande Hulanda pa analisis. Parce cu cachonan den area a move cu e cabez te cu el a wordo riba caminda pa bay Washington Park.
Spèkè ta un persona cu tur hende conoce na Rincon. E ta un persona cu a traha hopi aña den mundo di horeca. Ultimo e ta trahando como Concierge na Scol Reina Beatrix na Bonaire.
