Segun Tisa LaSorte, CEO di AHATA:
*Por ehemplo baha tarifa di awa y coriente
*Elimina BBO, BAZV y BAVP
ORANJESTAD (AAN) — DIARIO a entrevista Tisa LaSorte, CEO di Aruba Hotel & Industry Association (AHATA) tocante e cambio cu, manera ta conoci den comunidad, e minister saliente di Labor a laga atras pa wordo ehecuta, y cu ta toca salario minimo.
LaSorte a bisa cu e tin entendi cu gobierno kier cambia e salario minimo pa un salario basa riba horario di trabao, pa locual e tin comprension.
El a declara toch, cu di otro banda, mester sa cu ora bo ta hisa e salario minimo bo no ta hisa e forza di compra di un persona, di un comunidad, y esey por ta un problema.
“Loke ta pasa e ora ey ta cu bo a hisa e gasto di e compania; e compania ta hisa su prijs, pues e mesun persona ey ta keda cu un prijs cu no por paga, si esey ta e problema cu ta purbando di soluciona, mester solucion’e di un otro manera pa por hisa e forza di compra di e persona”, Tisa LaSorte a indica.
El a señala cu esey por haci por ehemplo, door di baha e prijs di coriente, cu ta hopi halto actualmente. Baha prijs di awa, cu nan a hisa algun aña pasa, baha prijs di gasoline, kita BBO, kita BAZV y VABP. “Nos tin varios otro manera cu por hisa e forza di compra di un persona, sin hisa e gastonan di e compania cu e ora ey ta hisa prijs”, Tisa LaSorte a subraya.
El a agrega cu e tema aki, specificamente, como AHATA no a papia cu gobierno riba dje, pero e tin entendi cu el a bay SER, y SER ta un entidad cu ta inclui gremio, pero AHATA por wak e rapport di SER pa wak kico e ta recomenda.
El a indica tambe cu den e miembresia di AHATA no tin hopi compania, pero tin si, cu ta preocupa. No ta hopi ta paga a base di minimum loon pero tin si, pero mester corda cu tin hende cu ta na e nivel aki di salario pero ta gana hopi placa na tips, tambe, como cu nan no ta paga impuesto riba esaki.
“Dus, e hecho cu bo por ta registra como un persona cu ta ganando salario minimo, no kiermen cu esey ta unico entrada cu e tin. Por ta bo tin mas entrada via bo trabao mes, manera tips, cu ta hisa bo entrada”, el a reitera.
El a agrega cu e ta kere cu esaki ta otro preocupacion unda Aruba mester haci un analisis, ora ta papia, por ehemplo, di personanan cu ta gana bestand minimo, cuanto di nan ta inclui personanan cu ta gana tips tambe cu por ta no ta un entrada asina abao. “Esey ta falta di informacion ainda cu nos tin. Tin varios compania preocupa si, pasobra si bo tin hopi hende na un nivel cu ta cambia di un dia pa otro, esey ta afecta bo gastonan hopi”, Tisa LaSorte, CEO di AHATA a remarca.
