Directie Natuur en Milieu:
ORANJESTAD (AAN): E 𝐒𝐭𝐞𝐫𝐧𝐜𝐡𝐢 𝐜𝐡𝐢𝐤𝐢𝐭𝐨 (𝒮𝓉𝑒𝓇𝓃𝒶 𝒶𝓃𝓉𝒾𝓁𝓁𝒶𝓇𝓊𝓂) ta un sorto di ‘tern’ mas chikito cu ta haya na Aruba. Na Ingles e ta yama ‘Least tern’ y e ta origina di Noord America y tambe Sur America.
E sternchi chikito ta midi 22 pa 24 centimeter largo cu un midi di hala habri di 50 centimeter. E ta pisa entre 39 pa 52 gram. E parti ariba di su curpa tin un plumashi shinishi cla y e parti di abou ta blanco. Riba su cabes tin manera un capa preto y un liña cu ta core door di su wowo preto te na e comienso di su piek.
Den winter su plumashi na e frenta ta mas blanco y e parti preto ta menos grandi. E diferencia entre e sterchi chikito y e otronan ta cu mayoria di su curpa ta shinishi cla y no ful blanco y nan tin un yamada diferente cu ta un grito mas pisa.
E piek geel di e sternchi chikito tin un punta preto riba dje den zomer pero esaki ta cambia di color den winter pa ful preto. E pianan ta geel.
E halanan pa mayoria parti ta color shinishi cla pero den vuelo por mira cu na e parti mas visibel na final di e pluma tin un rand preto. E sternchi chikito ta bula hopi lihe riba awa, e ta haci hopi kenshi cu su halanan y e ta duna un apariencia cu e tin lomba dobla, y su piek ta punta pa abou.
E poblacion ta aproximadamente 21,500 pareha; actualmente e sorto aki ta considera menasa den hopi pais na unda e sorto aki ta reproduci. E sternchi chikito ta scoge luga di reproduccion na costa marino of riba islanan di rif, of den areanan na unda no tin hende of predador ta frecuenta. E menasanan pa e sorto aki ta ta inclui predadonan di e webonan, lama cu ta subi na nivel halto y e uzo recreacional di lama of area unda cu e parhanan aki ta pone webo.
E buscamento di pareha ta tuma luga den un forma di exhibicion aereo na unda e embra ta sigui e vuelo di e macho of tambe door di duna alimentacion. E neishinan por consisti di 1 pa 4 webo. E adultonan tin un comportacion di spart of sacudi awa riba e webonan ora nan yega e neishi.
E macho y e embra ta yuda pa broei e webonan durante 3 siman. Tambe nan por bombardia bo cu nan fecalia pa defende nan neishi. E yiunan por bula despues di 4 siman y nan ta pasa nan prome aña den e zona di migracion. Aruba ta un anfitrion pa e sternchi aki, cu neishi tur rond nos costa.
Colaboracion di potret: @Aruba Birdlife Conservation
Fuente: Directie Natuur en Milieu
